Xuska Sadex sanno Guuradii aasaaska Ciidamada Bada ee Punt land oo Si Mug leh loogu dabaal degay

Boosaaso 05.October 2013 (SDN)- Munaasabad ku aaddan saddex sano-guuradii ka soo wareegtay aasaaskii ciidamada badda ee maamulka Puntland ayaa maanta lagu qabtay xero wayn oo ciidamadu ay ku leeyihiin galbeedka magaalada Boosaaso.

Cutubyo ka tirsan ciidamada badda ayaa goobta ku soo bandhigay dhoollatus ay ku muujinayeen xirfaddooda iyo howlaha ay qabtaan, waxaana goobta ka muuqday hubka noocyadiisa kala duwan iyo qaabka ay ugu tababaran yihiin la dagaallanka iyo ka hor-tagga burcad badeedda iyo kalluumaysiga sharci darrada ah.

Taliyaha ciidamada badda ee maamulka Puntland Jeneraal Cabdirisaaq Diiriye Faarax ayaa sheegay in ciidanka badda uu wax weyn ka qabtay yareynta dhibaatooyinka burcad badeedda iyo kalluumeysatada sharci darrada ah, isagoo u hambalyeeyay dhammaan saraakiisha iyo dableyda ka tirsan ciidanka badda.

Sannadkii 2010-kii ayaa la aasaasay ciidamada badda maamulka Puntland kuwaasoo ilaa xilligaas si toos ah uga howlgalayey xeebaha, kana qeyb qaadanayay dadaallada looga hor-tagayo afduubyada iyo dhibaatooyinka ay geysanayaan burcad badeedda.

Boosaaso SDN.

Qurbejoog.com