Xulalka Maroodi Jeex iyo Hawd oo Mar kale isku Haleelaya Ciyaarta kama danbaysta ah ee Gobolada Somaliland

Hargaysa 18.June (SDN) Xulalka Kubadda Cagta ee Gobolka Maroodijeex iyo Hawd ayaa u Gudbay Ciyaarta Gaba Gabada Tartanka Koobka Gobolada Somaliland kadib markii ay Si Xarago leh uga Badiyeen Xulalka Gebilay iyo Daad Madheedh oo ay  galabta isaga hor yimaadeen Ciyaarahaha Simi fanaylka ee Tartanka Kubada Cagta ee Gobolada Somaliland.

Ciyaarta hore ayaa dhex martay Gobolada Maroodi Jeex iyo Gebilay  Ciyaartan oo aad u xamaasad badnayd isla markaana ay laba Tarabuunba buuxeen, waxay ahayd ciyaar adag oo labada xulba ay ku jireen feejignaan dheeraad ah isla markaana ahayd ciyaar farsamadeedu saraysay oo labada xulba ay is ceshanayeen.

Ciyaartu waxay qeybtii hore ku dhammaatay barbar dhac eber iyo eber ah, hase yeeshee markii qeybtii labaad la iskugu soo noqday ayaa xulka gobolka Maroodi-jeex waxay heleen goolkoodii koowaad oo uu u dhaliyay ciyaar yahanka la yidhaahdo Siciid Fiyeera oo khadka dhexe ka ciyaara.

Daqiiqado ka dib ayaa ciyaar yahahanadda xulka Gabiley ay ka faa’iideeyeen kubad qurux badnayd oo ay aad iskugu dhiib-dhiibeen, waxaana goolkii bar-bar dhaca u dhaliyay Khadiir Mustafe oo ka mid ah weeraryahanadda gobolka Gabiley.

Gabo-gabadii qeybtii labaad ee ciyaartan waxa xulka Gobolka Maroodi-jeex u dhaliyay goolkii labaad ee Guusha Ciyaaryahanka Cabdi Riyaad oo ka mid ah weeraryahanadda gobolka Maroodi-jeex, sidaasna waxa ciyaarta kama dambaysta ugu soo baxay xulka Maroodijeex oo haysta horyaalka ciyaaraha kubaddaha cagta iyo kollayga ee tartanka goboladda Somaliland.

Ciyaarta labaad ayaa dhex martay Xulalka Gobolada Daad Madheedh iyo Hawd,Ciyaartan oo ahayd Mid Xiiso badan lahayd isla markaana Labada Xul soo bandhigeen Qaab Ciyaareed ku dhisan Weerar iyo Weerar Celis Waxaanay Labada Xul u Muuqdeen Kuwo is ceshanaya inkasta oo qaybtii hore ee Ciyaartu ay ku dhamaatay barbar dhac Eber iyo Eber ah .

Hasa yeeshee qaybtii labaad ee ciyaarta ayaa waxaa Kubad Si fiican looga soo Shaqeeyay Waxaa Shabaqa Goolka Daad Madheedh ku Hubsaday Weerar yahanka afka Hore ee Gobolka Hawd ee lagu Magaacabo Sheekhaawi sitana Nombarka 9aad,Kaas oo Noqday Goolkii ay Guusha ku Beegsadeen.

Hargaysa SDN.

Qurbejoog.com