Xiisad Colaadeed Oo Ka Taagan Gobolka Sanaag Oo U Dhaxaysa Ciidamada Somaliland Iyo kuwa SSC-Khaatumo

Ceerigabo (QJ) – Waxaa soo baxaya warar is khilaafaya oo ku saabsan xiisada colaadeed ee ka taagan gobolka Sanaag gaar ahaan magaalada Ceerigaabo oo ay ku lug leeyihiin ciidamada Somaliland iyo kuwa SSC-Khaatumo.

Xiisadan oo bilihii la soo dhaafay ka taagneyd magaalada Ceerigaabo ayaa saacadihii la soo dhaafay sii xoogeystay, waxaana xiisadan ay abuurtay xaalad kacsanaan ah. Dhaqdhaqaaqyo ciidan ayaa lagu arkayaa goobaha ay bulshadu ku xiriirto, iyadoo baraha bulshada lagu arkayay muuqaalo iyo muuqaallo muujinaya ciidamo hubeysan iyo kuwo diyaarsan oo labada dhinac ah.

Ilo wareedyo ayaa ku waramaya in ciidamada Somaliland oo ay wehliyaan maleeshiyaad hubeysan ay saaka dhaqdhaqaaqyo ka sameeyeen magaalada Ceerigaabo, taasoo muujineysa in uu sii xoogeysanayo dagaalka. Sidoo kale ciidamada SSC-Khaatumo ee fadhigoodu yahay duleedka magaalada ayaa iyaguna dhaqdhaqaaqyo ciidan ka wada jiidaha ay ku sugan yihiin. Tani waxay soo jeedinaysaa in labada dhinacba ay u diyaar garoobeen iska hor imaad furan, iyadoo aysan muuqan dadaalo nabadeed oo lagu xalinayo xiisada taagan.

Xiisadda Ceerigaabo ayaa socotay muddo dhowr bilood ah, taas oo ay ka dhalatay colaad beeleedyo hore oo sii xoojiyey kala qaybsanaantii beelaha deegaanka.

Dagaaladan ayaa sidoo kale saameyn ku yeeshay deegaano kale oo ka tirsan gobolka Sanaag, gaar ahaan kuwa u dhow Ceerigaabo oo ay ku lug leeyihiin kooxo kala duwan oo ka soo jeeda beelaha deegaanka. Dad badan oo reer Ceerigaabo ah ayaa ka qaxay dagaaladii hore, taas oo keentay barakac iyo xaalado bini’aadantinimo oo sii xumaanaya.

Xiisado colaadeed oo maalmihii lasoo dhaafay ka taagnaa magaalada Laascaanood iyo deegaanada ku xeeran ayaa sare u qaaday xiisadda gobolka Sool. Somaliland ayaa hore u lumisay gacan ku haynta Laascaanood iyo magaalooyinka kale ee muhiimka ah ee gobolka.

Hadda, diiradda colaadda waxay u weecday dhinaca Ceerigaabo oo noqotay goobta dagaalka. Maamulka SSC-Khaatumo ayaa ujeedadoodu tahay sidii ay Somaliland ugala wareegi lahaayeen Ceerigaabo sidii ay ula qabsadeen magaalooyinka kale ee Laascaanood si ay awood buuxda uga yeeshaan gobolka.