Xasan Sheekh iyo C/Qaadir Firdhiye oo Villa Somalia ku kulmay

Muqdisho October 08, 2023 (QJ) -Madaxweynaha Soomaaliya, Xasan Sheekh Maxamuud, ayaa Xalay xarunta madaxtooyada Villa Somalia ku qaabilay hoggaamiyaha SSC-Khaatumo, Cabdulqaadir Cali Firdhiye.

Xasan Sheekh ayaa Firdhiye kala hadlay xaaladda deegaanada SSC-Khaatumo, gaar ahaan magaalada Laascaanood oo ay dagaalo ka dhaceen.

Firdhiye, hogaamiyaha SSC-Khaatumo, ayaa Madaxweyne Xasan Sheekh warbixin ka siiyey xaalada degaanada uu ka arrimiyo, waxaanu tilmaamay guulaha laga gaadhay colaada Somaliland iyo horumarka ka socda deegaanada uu ka taliyo.

Firdhiye ayaa sidoo kale Madaxweyne Xasan Sheekh u gudbiyay rabitaanka shacabka ku dhaqan degaanada uu ka arrimiyo, waxa uuna ugu baaqay dowladda inay taageerto maamulkooda oo ay siiso xuquuqdooda.

Hogaamiyaha SSC-Khaatumo ayaa soo gaaray magaalada Muqdisho ka dib markii uu casuumaad ka helay Ra’iisul Wasaare Xamse Cabdi Bare, waxaana uu kulamo la qaatay madaxda ugu sareysa dowladda, isagoo taageero u raadinaya maamulkiisa.