“Waxaan dhaleeceynayaa weerarkan fuleynimo oo ujeedkiisu uu yahay cabsi-gelinta shacabka Soomaaliyeed” Ra’isal Wasaare Saacid

Muqdisho 09.Nov 2013 (SDN)- Ra’iisal wasaaraha xukuumadda federaalka ah ee Soomaaliya Cabduqaadir Faarax Shirdoon ayaa si kulul u cambaareeyay qarax loo adeegsaday gaari walxo qarxa lagu soo qariyay oo xalay fiidkii ka dhacay hoteel Maka Al-Mukarrama ee magaalada Muqdisho.

War-saxaafadeed ka soo baxay xafiiska raysul wasaaraha ayaa lagu sheegay in ay qaraxa fuliyeen kuwo diiddan samaha iyo nabadda.

“Waxaan dhaleeceynayaa weerarkan fuleynimo oo ujeedkiisu uu yahay cabsi-gelinta shacabka Soomaaliyeed. Waxaa xaqiiqo ah in weerarradan qorsheysan ee argagixiso ay ka dambeeyaan kuwo arxan-daran oo cadow ku ah qarannimada iyo horumarka Soomaaliya” ayuu yiri raysul wasaaraha.

“Waxaan u sheegaynaa inaysan caqabad ku sii ahaan doonin ummadeenna. Alle idankiisna aan ka guuleysan doonno” ayuu intaa ku daray.

Qaraxa oo ka dhacay afaafka hore ee hoteel Maka Al-Mukarrama ayaa sababay dhimashada shan qof iyo dhaawaca 16 qof oo kale.

Ciidamada nabad-sugida dowladda Soomaaliya ayaa xiligan ku howlan sidii ay wax badan uga ogaan lahaayeen sida uu qaraxu u dhacay, waxaana socda su’aalo la weydiinayo nin dhalinyarro ah oo xalay lagu qabtay gudaha hotelka.

Muqdisho SDN.

Qurbejoog.com