War Deg Deg ah: Weerar Ismiidaamin ah oo ka dhacay Xeebta Liido iyo Rasaas xoogan oo halkaasi ka Socota

 

Muqdisho,21jan,2016(QJ/SDN)-Weerar Ismiidaamin ah ayaa waxa uu goor dhoweyd ka dhacay Baar Beach View oo ku yaalla Xeebta Liido ee magaalada Muqdisho kaasi oo ku bilowday Rasaas waxaana xigay weerarka Ismiidaaminta ah.

Xilliga uu weerarka Ismiidaaminta ah dhacaayay ayaa waxaa halkaasi la sheegayaa inay ku shaahayeen Masuuliyiin ka tirsan Dowlada iyo Dad halkaasi u damaashaad tagay.

Waxa gudaha Beach View hadda la maqlayaa Rasaas xooggan waxaana sidoo kale halkaasi gaadhay gaadiidka Ciidamada Booliska iyo Nabadsugida.

Sidoo kale, waxaa halkaasi ku qulqulaaya Gaadiidka Gurmadka waxaana socda rasaas xoogan oo ay ridayaan Ciidamada Dowlada, iyadoona warar kaasi ka duwan ay sheegayaan in gudaha ay galeen dagaalyahaanno hubeysan.

Baararka kale ee ku dhow dhow Beach View ayaa waxaa sidoo kale ka dhacaaya rasaas xoogan, waxaana caawa khal-khalay Jawiga Xeebta Liido.

Ciidamo farabadan ayaa waxaa lagu daadiyay Xeebta Liido, kuwaasi oo diidan in gudaha loo galo ama laga soo baxo.

La soco wixii warar ah oo kusoo kordha wararkeena danbe