Waaxda Argagixisada La Dagaalanta Ee Ciidanka Puntland Oo Talis Cusub Loo Magacaabay
Garowe:23-March-2014(SDN)-Taliska Guud ee Ciidanka Puntland General Siciid Dheere, ayaa Kornayl Cabdiqaadir Xasan Cadde u magacaabay inuu Noqdo Taliyaha Ciidanka Puntland eek u sugan Aagga Galgala.
Wareegto ka Soo Baxday Taliska Guud ee Ciidanka ayaa lagu sheegay in Cabdiqaadir Xasan uu Yahay nin Karti iyo aqoon Buuxda u leh Hawsha loo Dhiibay, waxana loo Rajeeyey inuu Si fiican Shaqadiisa u Gudan doono.
Taliyaha cusub ee lasoo magacaabay ayaa hore usoo noqday taliyaha ciidamada ammaanka gobolka Mudug ee maamulka Puntland, wuxuuna beddeli doonaa Kol. Jaamac Siciid Warsame Af-guduud oo 17-kii bishan lagu diley duleedka magaalada Boosaaso, xilli uu ku sii Socday Dhinaca Deegaanka ay Ciidanku ku sugan yihiin.
Dilkiisa waxaa sheegtay Ururka Al-shabaab oo fadhiisimo ciidan kuleh gobolka Bari, dhowr mar oo horena ay dagaallo xooggani dhex mareeen iyaga iyo ciidamada ammaanka ee Puntland.
Taliyahan Cusub ee loo Magacaabay Ciidanka La Dagaalka Argagixisada Puntland, ayaa lagu sheegay inuu leeyahay Khibrad iyo Aqoon Gaadhsiisan Meel Durugsan, waxana la Filayaa inuu Dardar Geliyo Hawlaha shaqo ee loo igmaday.
S.D.N