Unugyo ka Tirsan Booliska Somalia oo la Geeyay Magaalada Jawhar

Jawhar 12.June 2014 (SDN)- Cutubkii ugu horreeyey ee ka socda ciidanka booliska Soomaaliyeed ayaa xalay gaaray magaalada Jowhar ee xarunta gobolka Shabeellaha dhexe.

Ciidanka oo wata gawaarida gaashaaman iyo kuwa xamuulka ah oo ka yimid dhinaca magaalada Muqdisho ayaa Jowhar u tagay in ay xoojiyaan ciidamada ammaanka ee magaaladaas, sida ay Warbaahinta u sheegeen saraakiil ka tirsan ciidamada dowladda ee gobolka.

Saraakiisha ayaa intaas ku daray in keenista ciidanka ay dowladdu uga jawaabeysa codsi ku aaddanaa ciidan boolis ah oo la geeyo Jowhar oo ay hore u gudbiyeen mas’uuliyiinta iyo bulshada degmada Jowhar.

Qaar kamid ah odayaasha dhaqanka iyo ganacsatada Jowhar ayaa soo dhaweeyey keenista ciidanka, waxayna sheegeen in ay wax badan ka beddeli doonaan dadaallada lagu sugayo nabadgelyada.

Madaxweynaha iyo ra’iisul wasaaraha Soomaaliya oo marar kala duwan booqday Jowhar ayaa  ballaanqaaday ciidamo ka qeyb qaata ammaanka oo la geeyo Jowhar.

Jawhar SDN/QJ

contact@qurbejoog.com