Taageerayaasha Xusbiga UCID Oo Maanta Goobo Kala Duwan Oo Kamida Caasimada Hargeysa Ku Soo Bandhiigay Cududiisa Shacab
Hargeysa (SDN)- Wareega labaad ee ololaha doorashada golayaasha deegaanka Somaliland oo shalay ka bilaabay guud ahaan Gobolada iyo degmooyinka dalka, ayaa waxa maanta isku soo baxyo Gobolada dalka ka sameeyay Taageerayaasha musharixiinta xisbiga UCID.
Musharixiinta xisbiga UCID uga sharaxan degmooyinka dalka ayaa si gaar gaar ah u soo bandhigay cududooda taageero, waxaanu mid walba shacabiyadda uu haysto ku soo ururiyey xafiiskiisa koowaad ee Ololaha doorashada deegaanada.
Magaaladda Hargeysa oo ah halka ugu mudan ee ururada iyo axsaabtu diirada saarayaan, ayaa Musharixiintooda u tartamaya golaha deegaanku caasimaddu waxay muujiyeen taageero aad u laxaad badan, iyadda oo Musharax kastaa uu xafiiskiisa soo hor-dhoobay boqolaal taageerayaashiisa ah oo sita calanka xisbiga UCID iyo waliba sawirada Musharixiinta.
Guddoomiyaha Xisbiga UCID Eng Faysal Cali Waraabe iyo Masuuliyiinta kale ee xisbigaasi oo si gooni gooni u tagay xarumaha Musharixiintu ku soo bandhigayeen taageerayaashooda, ayaa khudbado ku aadan ololaha doorashada deegaanada Somaliland u jeediyey taageerayaasha, waxayna u soo jeediyeen inay codkooda ugu deeqaan Musharixiinta UCID u tartamaysa, kuwaasi oo ay sheegen inay wax badan ka qaban doonaan baahiyaha aasaasiga ah ee ka jira Magaalooyinka dalka.
Masuuliyiinta UCID ee la hadlay taageerayaasha ayaa sheegay in xisbigoodu balan-qaadayo inuu wax badan ka qaban doono baahiyaha dadku tabanayaan, kuwaasi oo ay tilmaameen inay hadda dhaliilan yihiin, isla-markaana xisbiga UCID u taagan yahay sidii wax badan looga qaban lahaa bilicda Magaalooyinka dalka oo dhan, siiba Caasimadda Hargeysa.
Musharixiinta xisbiga UCID uga sharaxan golaha deegaanka Hargeysa, ayaa mid walba waxa uu si gaar ah u soo bandhigay cududa taageerayaashiisa, kuwaasi oo uu subaxdii horeba soo dhoobay xafiis ka mid ah kuwa oo ugu tallo-galay ololaha uu ugu jiro
Sidoo kale, Musharixiinta UCID ee Magaalooyinka Borama, Berbera, Ceerigaabo, Laascaanood, Burco iyo Gabiley, ayaa iyaguna mid mid u soo bandhigay cududa taageerayaashooda, iyadda oo goob kasta oo musharax taageerayaashiisa isugu keenay Masuuliyiinta xisbiga u qaabilsan goboladaasi ay khudbado uga jeedinayeen, iyagga oo ka codsanayey inay taageerada ay musharixiinta u muujiyeen codkoodana laga arko.
Masuuliyiinta UCID ee Hargeysa, ayaa waxay gabi ahaan mareen goobaha musharixiintoodu ku soo bandhigayeen cududa taageerayaashooda.
www.Somalideasporanews.com Hargeisa