Soomaaliya oo ka jawaabtay dalkii Ruto

Caruusha December 01, 2024 (QJ) – Soomaaliya ayaa ka jawaabtay hadalkii Madaxweynaha Kenya William Ruto ee ahaa inuu ka shaqeynayo fududeynta wadahadal dhexmara Madaxweynaha Soomaaliya Xasan Sheekh Maxamuud iyo Ra’iisul Wasaaraha Itoobiya Abiy Axmed. Hadda waxaa jira khilaaf xooggan oo u dhaxeeya madaxda labadan dal.

Safiirka Dowladda Federaalka ah ee Soomaaliya u fadhiya dalka Tanzania, Ilyaas Cali Xasan, ayaa sheegay in Soomaaliya ay soo dhoweyneyso dadaallada madaxda dowlad goboleedyada ee ku aaddan ilaalinta nabadda, amniga iyo xasilloonida Geeska Afrika.

Safiirka ayaa sidoo kale ku nuuxnuuxsaday in mowqifka Soomaaliya uusan waxba iska bedelin, isagoo caddeeyay in Itoobiya ay ku qasban tahay inay baabi’iso heshiiskii ay la gashay Somaliland, ayna ixtiraamto midnimada iyo madax-bannaanida ummadda Soomaaliyeed.

“Mowqifka Soomaaliya weli waxba iskama bedelin: heshiiskii January 1, 2024, waa in meesha laga saaraa, waa in la ixtiraamaa madax-banaanida, midnimada, iyo midnimada Soomaaliya” ayuu yiri Danjire Ilyaas.

Horay waxaa u fashilmay isku daygii Turkiga ee ahaa in uu dhex dhexaadiyo wada hadalada Soomaaliya iyo Itoobiya si loo xaliyo khilaafkooda. Khilaafka ayaa weli ah mid adag in la xaliyo iyadoo ay ugu wacan tahay shuruudaha adag ee ay dejiyeen labada dhinac.