Roobab Khasaare Nafeed Geystay oo Ka Da’ay Gobolka Salal
Saylac:18-Aug-2013-(SDN)- Alla Ha u naxariistee Hal qof ayaa dhintay, laba kalena waa la la’yahay meel ay jaan iyo cidhib dhigeen ka dib markii Habeenkii xalay Roobab xooggan oo Daadad wataa ka da’een Degmada Saylac ee Gobolka Salal.
Guddoomiyaha Golaha degaanka ee degmada Saylac, Xuseen Iidle Barkhadle ayaa qaar ka mid ah warbaahinta u sheegay in saddexda qof oo ahaa reer miyi uu daadku qaaday, iyadoo sidoo kalena uu daadku la tagay geel aan tiradiisa la sheegin.
Daadka ayaa la sheegay inuu gaadhay dooxada Salal ee degmada Saylac, halkaas oo aan la hubin khaasaraha uu gaadhsiiyey.
Wuxuu tilmaamay in baadigoob ay ugu jiraan labada qof ee kale ee uu qaaday daadka inkastoo aanay haysan farsamo dadkaa lagu raadin karo iyo qalab midna.
Xuseen Iidle ayaa ugu digay dadka deegaanka roobabka iyo dabaylaha mararka qaar ka dhaca qaybo ka tirsan gobolka Awdal.
Xilli sii horeysay ayaa haweeney ku dhimatay roob dabeylo wata oo ka da’ay tuulada Fiqi Aadan ee degmada Saylac.
Somalidiasporanews.com