Ra’isal Wasaaraha Cusub ee Somalia oo Dhanbaal Hambalyo ah ka helay Dhigiisa Turkiga Recep Tayyip Erdogan

Muqdisho 23.Dec 2013 (SDN)- Raysul wasaaraha dalka Turkiga Recep Tayyip Erdogan ayaa dhambaal hambalyo ah u diray dhiggiisa dalka Soomaaliya, Cabdiweli Sheekh Axmed, oo dhowaan loo magacaabay raysul wasaaraha jamhuuriyadda federaalka ah ee Soomaaliya.

Raysul wasaare Recep Erdogan ayaa dhambaalkiisa hambalyada wuxuu ku sheegay in dowladda Turkiga ay rajayneyso in labada qaran ay sii xoojiyaan xiriirka walaaltinnimo iyo saaxiibtinnimo ee ay wadagaan.

Wuxuu rajo ka muujiyay in xukuumadda uu hoggaamin doono raysul waaraha cusub ay noqon doonto mid ku guuleysata howlaha qaran ee loo igmaday iyo himilooyinka shacabka Soomaaliyeed iyo weliba inay noqoto mid beesha caalamka kala shaqeysa sidii nabad iyo xasillooni loogu soo dabbaali lahaa dalka Soomaaliya.

Recep Erdogan ayaa xaqiijiyay in dowladdiisa ay sii wadi doonto dadaallada dib loogu dhisayo Soomaaliya iyo xoojinta wada-shaqeynta ay la leedahay dowladda Soomaaliya.

Muqdisho SDN.

Qurbejoog.com