“Ragga uu hungurigu ka hayo dalkan, waxaan leeyahay waar damaciinna ku dara tudhaale iyo lexejeclo oo waa la doogiye yaan la dacaroon” Madaxweyne Siilaanyo
Hargeysa:May,18,2015(SDN/QJ)-Madaxweynaha Jamhuuriyadda Somaliland Mudane Axmed Maxamed Maxamuud(Siilaanyo), ayaa maanta shacabkiisa u jeediyey Khudbad dhinacyo badan taabanaysa oo uu kaga Hadlay Xaalado kala duwan oo Dalka ku gedaaman.
Khudbadda maanta ee Madaxweynaha oo ahayd mid uu ugu talo galay Munaasibadd 18-ka, ayaa ku dheeraaday Waxqabadka xukuumaddiisa, Dib uddhaca doorashooyinka, Xidhiidha ay Beesha caalamka la leeyihiin iyo arrimaha Mandaqadda oo uu si gaar ah usoo hadal qaaday Ciidamo loo samaynayo Somalia.
Ugu horrayn Madaxweyne Siilaanyo waxa uu ku faanay in intii xukuumaddiisu jirtey uu yaraaday khilaafkii soo kala dhexgeli jirey Dawladda iyo Goleyaasha Sharcidejintu, taasina keentay in waxqabadku yimaaddo, “Intii Xukumaddani jirtay waxaa meesha ka baxay khilaafaadkii u dhexayn jiray Goleyaasha Dawladda, taasina waxay keentay in xeerar iyo shuruuc badan oo baahi loo qabay u soo baxaan dalka” ayuu yidhi Madaxweyne Siilaanyo.
Madaxweyne Siilaanyo, ayaa sidoo kale ka hadlay arrimaha doorashada, waxana uu sheegay inaanay jirin wax uu ka hagraday sidii doorasho u dhici lahayd, isla-markaana aanu ku faraxsanayn in dibu dhacaasi yimaaddo, waxana uu yidhi, “Waxaan xoog badan saaray in doorashooyinku ku dhacaan xilligii loo asteeyay, mana jiro waxaanu hagranay aniga iyo Maamulkaygu toona. Kuma faraxsani in doorashadu dib u dhacdo, mana jecli hore iyo hadda toona turun turooyinka ku yimaada hanaanka dimuqraadiyadda.waxase dhici kara in marka aad hawl adag ku jirto ay soo baxaan duruufo wax ka bedeli kara hawshii aad qoondaysatay.arrimaha doorashooyinku waa masuuliyad wadareed oo ay wadaagaan dhinacyo badan, canaanta dib u dhacu waa mid la wada leeyahay, waxaynu nahay qaran leh Shuruuc, haddaba marka xaaladdan oo kale timaado Distoorka qaranka ayaa hagaya jidka loo marayo, Komishanka doorashadu wuxuu ii soo gudbiyay Go’aan ah inaan doorashadu wakhtigeeda ku qabsoomi karrin, aniguna waxaan u gudbiyay Golaha guurtida oo leh Awooda qiimaynta xaaladdahaas, mana jirto wax faro galin ah oo aan ku lahaa go’aanka ka soo baxay guurtida”
Madaxweynaha Somaliland waxa uu u mahadceliyay Mucaaradka oo aqbalay wada hadal laga yeesho Muranka arrimaha siyaasadda ee muddo kordhinta ka dhashay.
Madaxweynaha Somaliland waxa uu ugu baaqay Mucaaradka samir iyo dulqaad “Ragga uu hungurigu ka hayo dalkan, waxaan leeyahay waar damaciinna ku dara tudhaale iyo lexejeclo oo waa la doogiye yaan la dacaroon” ayuu yidhi Madaxweyne Siilaanyo.
Madaxweynaha Somaliland waxa uu walaaca beesha Caalamka ee dib u dhaca doorashada ku tilmaamay arrin ku timid warar aan xaqiiq ku salaysnayn oo loo gudbiyay wakiiladooda Somaliland iyo Somalia qaabilsan “Qaar kamid ah wakiilada beesha caalamka waxaa ka muuqda inuu gaadhay warar xaqiiqda ka fog, kaas oo keenay inay walwal ka muujiyaan dib u dhaca yimid, Saaxiibadayo waxaan xasuusinayaa inaanu nahay qaran waayo aragnimo weyn u leh xakamaynta iyo xal u helista khilaafyada Siyaasiga ah.
Mudane Axmed Maxamed Siilaanyo waxa uu ka hadlay doorka caalamka ee dhexdhexaadinta Somaliland iyo Somalia “Waxaa xusid mudan inaanu beesha caalamka ka codsanay inay na dhexdhexaadiyaan anaga iyo walaalahayo Somalia, hase ahaatee wali wax jawaab ah oo wax ku ool ah kamaanu helin, haddaba waxaa isku kaayo qaban la sida dawladdaha qaar ugu degdegayaan arrimaha gudahayaga ah ee aanu ku filannahay iyo sida ay uga warwareegayaan ee ay isku diidsiinayaan dhexdhexaadinta ismari waaga ka dhex aloosan Somaliland iyo Somalia”
Madaxweynaha Somaliland waxa uu ka digay Ciidanka Somalia samaysanayso ee lagu sheegay Ciidan qaran oo uu sheegay inay halis ku yihiin amaanka Somaliland “Si mandaqada geeska Africa u noqoto midi xassilloon oo shucuubteedu nabad kuwada noolaadaan, waxaa Xukumadda ka go’an inay sii xoojiso xidhiidhka ay la leedahay wadamada jaarka ah.waxaanu ognahay in maalmahan la wado hindise Ciidamo loogu dhisayo Somalia, kaas oo dalal caalamka ka tirsani ku garab siinayaan, Madaxda Somalia ayaa iyaguna ku celcelinaya in Ciidamadu soo celinayaan midnimadii Burburtay ee Somalia, haddaba waxaan ka digayaa in arrintani hurin karto colaado hor leh iyo xassillooni darro ku soo korodha geeska Africa, sidaas darteed waxaanu beesha caalamka ugu baaqaynaa in si qoto dheer looga fiirsado dhisidda ciidankaas iyo hubka lagu soo daldalayo Somalia, iyadoo aan Somaliland laga qaadin cuno qabatayntii la saaray wixii la isku odhan jiray Somalia republic” ayuu yidhi Madaxweynaha Somaliland.
SDN/QJ
Contact@somalidiasporanews.com