Mudada lagu Jiro Bisha Udxiyada oo Somalia laga Mamnuucay Gawraca Xoolaha Dhedig

Muqdisho 03.October 2013 (SDN)-Wasaaradda kheyraadka ee xukuumadda federaalka ah ee Soomaaliya ayaa maanta mamnuucday in la gowraco xoolaha dheddigga ah inta lagu jiro udxiyada.

Agaasimaha waaxda caafimaadka xoolaha ee wasaaradda kheyraadka Sowda Maxamuud Rooble oo shir jaraa’id ku qabatay Muqdisho ayaa dadka iyo hay’adaha samafalka uga digtay inay gowracaan neefka riman, kan irmaan iyo midka aan weli curan ee dheddigga ah.

Dadka ka shaqeeya kawaannada waxay ku guubaabisay inay ka qeyb qaataan sidii loo xakameyn lahaa dabar-jaridda xoolaha nool ee dheddigga ah.

Agaasimaha ayaa sheegtay inay xoolaha nool laf-dhabar u yihiin dhaqaalaha dalka.

Waxay ka digtay inaysan dhicin sidii udxiyadii sanadkii hore markaas oo la gowracay xoolo badan oo dheddig ahaa oo isugu jiray kuwo dhali lahaa oo ilmihii uurkooda ku jiray bannaanka lagu soo tuuray iyo kuwa aan weli curan.

Muqdisho SDN.

Qurbejoog.com