Midawga Africa oo Itoobiya ka reebay ciidamada Nabad ilaalinta Soomaaliya
Addis Ababa November 10, 2024(QJ) -Midowga Afrika ayaa go’aamiyay in ciidamada ka qeyb galaya howlgalka nabad ilaalinta ee Soomaaliya ay ka imaanayaan oo kaliya wadamada ixtiraamaya madax banaanida Soomaaliya.
Guddiga Midowga Afrika oo fulinaya go’aannada iyo howlgallada maalinlaha ah ee Midowga Afrika, ayaa la tashiyo la sameynaya dalalka Afrikaanka ah ee muujiyay inay diyaar u yihiin inay ciidamo ku biiriyaan howlgalka Midowga Afrika ee AMISOM, sida lagu sheegay war-saxaafadeed ka soo baxay Midowga Afrika. Golaha Nabadda iyo Ammaanka ee Midowga Afrika.
Golaha Nabadda iyo Ammaanka ee Midowga Afrika ayaa ka wada hadlay go’aanno la xiriira taageerada iyo xasilinta Midowga Afrika ee Soomaaliya (AUSSOM), kaasoo beddeli doona ATMIS. Goluhu waxa kale oo ay soo saareen bayaan ay ku faahfaahiyeen nuxurka shirka iyo go’aamadii ka soo baxay.
Iyadoo dowladda Soomaaliya ay martigelin doonto isla markaana ay dejin doonto howlgalka soo socda ee nabad ilaalinta, ayaa golaha ammaanka waxa uu sheegay in guddoomiyaha guddiga Midowga Afrika uu la kulmi doono dowladda federaalka Soomaaliya, si uu ugala hadlo qaabka ay noqon doonaan ciidamada howlgalka iyo dalalka ay ka imaanayaan.
Sidoo kale, Golaha Ammaanka iyo Nabadda ee Midowga Afrika ayaa ka hadlay oo go’aamo ka soo saaray colaadda u dhexeysa Itoobiya iyo Soomaaliya. Guddoomiyaha golaha ayaa sheegay in ay si dhow ula shaqeyn doonaan daneeyayaasha dhaqaalaha Afrika, hay’adaha gobolka iyo dhinacyada kale ee ay khuseyso si loo xaliyo khilaafka labada dal si degdeg ah.
Si loo xaliyo khilaafka labada dal, guddiga Midowga Afrika ayaa faray in la isticmaalo dhammaan dariiqooyinka diblomaasiyadeed ee la heli karo.
Sidoo kale, Guddigu wuxuu ku nuux-nuux saday in dadaallada lagu xallinayo khilaafka labada dal lagu saleeyo qodobka 4-aad ee Axdiga Midowga Afrika, Hab-maamuuska lagu dhisayo Golaha Nabadda iyo Ammaanka Midowga Afrika, Axdiga Qaramada Midoobay, iyo mabaadi’da deris-wanaagga. iyo sharciga caalamiga ah.