Marwada Madaxweynaha Somaliland oo Hadal ka Jeedisay Kulan hawleed ku Saabsan Wax ka qabashada Tacadiyada Haweenka iyo Caruurta

Hargaysa 23.Dec 2013 (SDN)- Gudoomiyaha Maxkamada Sare  Dr. Yusuf Ismaaciil Cali, ayaa   Magaalada  Xubno ka kala Socda, Xeer ilaalinta, Dembi baadhista, Bilayska iyo Gudoomiyayaasha Maxkamadaha  uga furay Magaalada Hargaysa kulan howleed  Ku saabsan    waxka qabashada  tacadiyada Haweenka iyo caruurta lagula kaco iyada oo loo marayo sharciga.

Kulan howleed-kan oo uu soo qaban-qaabiyay Xafiiska Baahi-koob kana  soo Qayb-galeen Marwada Madaxweynaha  Marwo  Aamina sh.Maxamed Jirde, Wasiir ku-xigeenada  wasaaradaha Caafimaadka iyo Shaqada iyo arimaha Bulshada, Marwo Nimco xuseen Qawdhan iyo marwo Shukri Xariir ismaaciil, Xeer ilaaliyaha Guud ee Qaranak md. Xasan Maxamed Aadan iyo Agaasimaha  Isbitaalka Guud ee Hargaysa Dr,Axmed X.Cumar Askar, hadal uu halkaa ka jeediyey Gudoomiyaha Maxkamada Sare Dr.Yusuf Ismaaciil cali ayaa    uu ku  sheegay, in Wax ka qabashada kiisaska Tacadiyada  haweenka ka dhanka  ah ee   mudooyinkan  danbe dalka Ku soo kordhaya ay tahay   mid   mudnaan uleh bulshada.

Waxa Gudoomiyuha Maxkamada sare  uu soo jeediyey inay lagama maar-maan tahay in ciqaabta ay mudan  yihiin la mariyo cidii Lagu soo eedeeyo dembiyada fara xumaynta Haweenka. Isaga oo intaa raaciyey in qof-ka xumaanta sameeyaa uu mudan yahay in ciqaabtiisa  la mariyo.

Marwada madaxweynaha  Marwo Aamina-weris sh.maxamed Jirde oo iyana halkaa ka hadashay ayaawaxa ay tilmaamtay ,in  dembiyada  tacadiyada  ka dhanka ah Haweenka  ay marka  hore waajib tahay in baadhis dhab ah oo sugan ay ka sameeyaan bahda garsoorku, waxaana Marwadu  xustay In haddii ay baasdhista dambiyadaasi xumaato , ay taasi keenayso In  Garsoorihii  kiiska la hor geeyey xukunkii uu  qaadi lahaa ka xumaanayo, oo xaakinku waayayo ayay tidhi cadayn buuxda oo uu u cuskado xukunkii  dembiilaha.

Xeer ilaaliyaha Guud   Mud,xasan Maxamed Aadan, oo isna  halkaa ka hadlay ayaa  ayaa    sheegay in dhamaan  Gobolada ay  ka sameeyeen Xafiisyo qaabilsan Dembiyada   fara xumaynta iyo Tacadiyada haweenka laga galo . Waxaanuu xeer ilaaliyuhu sheegay in sanadkan sii dhamaanaya ee 2013 ka Kiisaska  fara xumaynta Haweenka ee dalka ka dhacay ay dhan yihiin Boqol iyo afar Kiis, kiisaskaas oo ah kuwa soo galay xafiiska xeer ilaalinta.Waxaanuu sheegay in tiradaasi  muujinayso sida  uu kor ugu kacay fal denbiyeedkaasi  Haweenka ka dhanka ahi.

Waxa kale oo iyana halkaa ka hadlay Wasiir ku xigeenada wasaaradaha  Caafimaadka iyo shaqada iyo arimaha Bulshada marwo Nimco xuseen qawdhan iyo marwo Shugri  Xariir ismaaciil  iyo Agaasimaha Isbitaalka Guud  ee caasimada Hargeysa oo ka waramay fal-denbiyeed-yada Tacadiga Haweenka ka dhanka ah iyo sida ay waajib y tahay in loo wada Guntado sidii wax looga qaban lahaa.

Hargaysa SDN.

Qurbejoog.com