Mareykanka oo gaadiid dagaal ugu deeqay ciidamada DANAB

Muqdisho May 16, 2024 (QJ) -Taliyaha Ciidanka Xoogga dalka Soomaaliyeed General Ibraahim Sheekh Muxyadiin, ayaa maanta ka guddoomay gaadiid dagaal oo ay Dowladda Mareykanka ugu talagashay Ciidanka sida gaarka ah u tababaran ee Danab.

Gaadiidkaan ayaa ah kuwa loogu tala galay in ay ku hawlgalaan qeybta 16-aad ee ciidamada sida gaarka ah u tababaran ee Danab, waxaana taliyaha ciidamada xoogga dalka uu kula wareegay magaalada Muqdisho.

Sii hayaha Safaaradda Mareykanka ee Soomaaliya Shane L. Dixon ayaa gaadiidkan ku wareejiyay Taliyaha Ciidanka Xoogga dalka Soomaaliyeed, kuwaasi oo si gaar ah loogu talagalay in ay adeegsadaan Ciidanka sida gaarka ah u tababaran ee Danab.

Sidoo kale, Jeneraal Ibraahim Sheekh Muxudiin Caddow ayaa uga mahad celiyay dowladda Mareykanka taageerada ay ka geystaan dhanka tababarka iyo qalabeynta ciidamada milateriga iyo sida ay u caawiyaan ciidamada Soomaaliya.

Mareykanka ayaa sii wada taageerada tababarada, qalabeynta iyo howlgalada ciidamada xoogga dalka Soomaaliyeed, gaar ahaan kuwa Danab ee sida gaarka ah u tababaran.