Madaxweyne Siilaanyo Iyo Kooxda Ku Hareeraysan Oo Ka Naxay Hadalkii Muuse Biixi, Kuna Mashquulsan Qaabkii ay Jawaab u Bixin Lahaayeen
Hargeysa:May,06,2014(SDN/QJ)-Dhawaaqii dhawaan ka soo yeedhay Guddoomiye Muuse Biixi ee uu ku sheegay inuu u taagan yahay Musharaxnimada Madaxweynenimo ee Xisbiga Kulmiye, ayaa shaki iyo isku dhexyaac badan ka dhex dhaliyey Madaxtooyada Somaliland oo aan ku farxin hadalkan.
Sida ay sheegayaan warar aanu ka helayno Madaxtooyada Somaliland, waxa Hadalkaas aad u dhibsaday Hoggaanka sare ee Dalka oo uu ugu horreeyo madaxweyne Siilaanyo oo walaac badan ka muujiyey dhawaaqa sida degdegga ah uga soo baxay afka Guddoomiye Muuse.
Wasiirrada iyo xubnaha uu qalbigooda xulay Jacaylka Madaxweyne Siilaanyo, isla-markaana Godobta Badan u galay Xukuumadda Madaxweyne Siilaanyo, ayaa muraaradillaac ballaadhan ka muujiyey Hadalka Guddoomiyaha xisbiga, waxana ay soo jeediyeen in la diyaariyo Tallaabadii laga qaadi lahaa, maadaama uu ku dhiirraday inuu Odhaadhaas sheego xilli aan shirweynihii Xisbigaba laga joogin Toddobaad.
Wasiirrada Wasaaradaha Madaxtooyada, Duulista Hawada, Macdanta,Arrimahha Gudaha, Waxbarashada, Warshedaha iyo waliba Saraakiil tiro badan oo Guulwadaynta caan ku ah ayaa soo jeediyey in si wada jir ah jawaab looga bixiyo hadalkii Muuse Biixi, balse wali waxba la islama Meel dhigin.
Wali ma jirto tallaabo lagaga hortegayo Damaca Muuse Soo Qaddimay oo madaxtooyada shexdeeda la iskaga raacay, waxase haatan lagu hawllan yahay wixii laga odhan lahaa arrintaas, iyo waliba ciddii odhan lahayd.
Madaxtooyada ayaa si weyn uga naxday Hadalka Guddoomiyaha Kulmiye, waxana soo kordhaya wararka ay arrintaasi ku keentay Madaxweynaha iyo Kooxda ku Hareeraysan oo iyagu doonaya inuu madaxweynuhu shan sano oo kale soo noqdo.
Guddoomiye Muuse ayaa isagu markii uu hantiyey Sharciyadda Guddoonka Kulmiye u badheedhay inuu Musharax yahay, waxana taas ka dhashay Buuq iyo sawaxan shaki badan dabada ku haya oo Guddoomiye Muse looga shakiyey inuu arrintaas ka dhabayn doono.
Haddii uu hadalkaasi ka dhab yahay Guddoomiye Muuse Biixi, waxa xaqiiqo ah inuu heli doono Codad badan oo uu musharax ku noqon karo, waxase durtaba soo baxaya cadaadis ka dhan ah oo kaga imanaya dhinaca xukuumadda oo u muuqata mid isa siisay musharaxnimada Xisbiga ee shanta sano ee soo socota.
SDN/QJ-Hargeysa
Contact@somalidiasporanews.com
