Madaxweynayaasha Soomaaliya iyo Kenya Oo Ku Heshiiyey Dhowr Arrimood

Nairobi, 05 June 2013 – Madaxweynaha Jamhuuriyadda Federaalka Soomaaliya Mudane Xasan Sheikh Maxamud iyo Madaxweynaha dalka Kenya, Hon. Uhuru Kenyatta ayaa muddo labo cisho ah wada hadal ku yeeshey xarunta Madaxtooyada Nagana ee gobolka Nyere ee dalka Kenya.

Kulankan labada madaxweyne ayaa daba socdo kulankii ugu danbeeyey ee labada madaxweyne ay ku yeesheen Addis Ababa 28kii May iyo kii ka horeeeyey ee Mombasa. Labada Madaxweyne ayaa muddo labo casho ah ka wada hadlayey arrimo dhowr ah oo ay ka mid yihiin xiriirka labada dal, arrimaha amniga, qaxootiga iyo dib u dhiska dalka Soomaaliya.

Madaxweynaha Soomaaliya Mudane Xasan Sheekh Maxamud ayaa uga mahadceliyey Madaxweyne Uhuru Kenyatta iyo shacabka Kenya sida ay Soomaalida qaxootiga u soo dhoweeyeen iyo sida ay ciidamada Kenya naftooda ugu hureen dib u xorreynta iyo amni ku soo celinta dalka. Madaxweynaha Somalia ayaa tacsi gaar ah u direy labo askari oo ka tirsan ciidanka Kenya ee AMISOM oo maanta ku geeriyooday Jubbooyinka, waxuuna sheegey inay u dhinteen badbaadinta shacabka Soomaaliyeed.

Madaxweynaha Soomaaliya ayaa si kulul u cambaareeyey falalka argagaxisada ee Al-Shabaab sheegeyna inay khatar ku yihiin Soomaalia iyo waddamada deriska ah, isla markaana aysan xambaarsaneyn wax diin ah oo dhammaan falalkooda argagaxa ay yihiin kuwo ka soo horjeeda bani’aadanimada iyo Islaamka.

Ugu danbeyntii labada madaxweyna ayaa isla gartay arrimahan:

1. In Shir caalami ah lagu qabto Kenya bisha August oo ay wada shir guddoominayaan Soomaaliya, Kenya iyo Qaramada Midoobey si xal loogu helo dib u celinta qaxootiga Soomaaliya ee ku sugan Kenya. Labada madaxweyne waxey hoosta ka xariiqeen in dib u celinta qaxootiga la waafajiyo shuruucda caalamiga ah oo dhammaan qaxootiga Soomaalida ay helaan xaquuqdooda muhiimka ah si ay dib u dhiska dalka uga qeyb qaataan.

2. In labada dal ay sameystaan guddi wadajir ah oo ka shaqeeya sidii loo hirgelin lahaa dhammaan qodobada lagu heshiiyey.

3. In labada dal ay iska kaashadaan soo celinta amniga iyo la dagaalanka kooxaha argagaxisada ah.

4. In dowladda Kenya ay u fidiso shaqaalaha dowladda tababar lagu kobcinayo tayada iyo waayo aragnimada shaqada si dowladda Soomaaliya ay ugu sahlanaato hirgelinta maamul wanaaga.

5. Iyo in labada Madaxweyne ay sii wadaan wadahadalkooda oo ay si joogta ah u kulmaan.

– DHAMAAD –

Abdirahman Omar Osman (Eng. Yarisow)

Senior Advisor & Spokesperson

Office of the President

The Federal Republic of Somalia

engabdirahman@gmail.com