Maamulka Kooxda Arsenal Oo Si Kulul U Beeniyey Inay Xidhiidh La Leeyihiin Wiilka Ku Biiray Dagaalyahannada Syria
London:07-April-2014(SDN)-Hoggaanka Sare ee Kooxda Dalkaasi Ingiriiska ka dhisan ee Arsenal ayaa Beeniyey Warar Warbaahintu Baahisay oo Sheegayey in Abu Isa Al-andalus (Abu Ciise Al-andalus) uu ka mid ahaa ciyaartoyda kooxda Arsenal.
Masuuliyiinta ka tirsan Arsenal ayaa sheegay in Abu Isa aanu u soo ciyaarin Arsenal waxayna intaa ku dareen inaanu u diiwaan gashanayn magacaas.
Wargayska Mirror ayaa faafiyay in Abu Isa uu u soo ciyaaray Arsenal wuxuuna intaa ku daray in Abu Isa ay saaxiibo ahayeen Cristiano Ronaldo yaraantiisii lakiin Arsenal ayaa iska fogaysay in Abu Isa uu u soo ciyaaray kooxdooda.
Abu Isa Al-andalus ayaa soo dhigay barta Internet-ka muuqaal uu ku cadeeyay inuu ka mid yahay mujaahidiinta Syria ee waqtigaan lajoogo la dagaalamaya Bashar al-Assad.
Ma aha markii ugu horaysay ee Arsenal lala xidhiidhiyo qof mujaahid ah, waxana hore loola xidhiidhiyay in Osama bin Laden uu taageere u ahaa Arsenal taas oo keentay inay aad uga cadhoodaan maamulka kooxda Arsenal qaar ka tirsan wargaysyada soo tabiya wararkaas.
S.D.N.