Kooxo hubeysan oo Haweeney ku dilay degmada Wadajir ee gobolka Banaadir

Muqdisho March 04 2013 (SDN)— Kooxo hubeysan ayaa waxaa la sheegay in xalay haweeyney ay ku dileen degmada Wadajir ee gobolka Banaadir.

Haweeneyda la dilay ayaa lagu magacaabaa Xabiibo Cali Ciiley taasi oo ka shaqeyneysay qeybta Nadaafada ee Isbitalka Daarushifa ee Magaalada Muqdisho.

Kooxaha dilka geystay ayaa ka baxsaday goobta, waxaana goobta soo gaaray Ciidamo ka tirsan kuwa dowladda oo howlgallo cid ay ku soo qabteen aan la shaacin ka sameeyay halkaasi.

Dad goobjoogayaal ah ayaa sheegay in dilka kooxaha geystay ay ka koobnaayeen 2-ruux oo Bastoolado wata kuwaasi oo ay tilmaameen in ay baxsadeen.

Lama oga sababta ka danbeeyay dilka Haweeneydan hase ahaatee shalay ayay aheyd markii haweeney ardayad aheyd lagu dilay degmada Wardhiigley ee gobolka Banaadir.

SDN-Muqdisho