Kooxda Ciidanka Asluubta ee Kubada Kolayga oo Mar kale Guul daro u Horseeday Kooxda Jabuuti City Council

Hargaysa 27.Aug 2013 (SDN)-Ciyaar Saaxiibtinimo oo Kubada Kolayga ah ayaa waxay galabta ku dhex martay garoonka Timcade ee magaalada hargaysa Kooxda Ciidanka Asluubta  iyo Naadiga Jabuuti City Council kuna ciyaara magaca golaha deegaanka ee degmada Jabuuti oo Maalmihii u danbeeyey ku sugnaa Caasimada Hargaysa .

Daawashada Ciyaartan waxaa ka soo qayb galay Agaasimaha Guud ee Wasaarada Ciyaaraha ,Gudoomiyeyaasha Xidhiidka Kubada Kolayga ee Somaliland iyo Dalka Jabuuti,Saraakiil ka socotay Ciidanka Qarranka ee Somaliland iyo dadweyne aad u tiro badan.

Ciyaarta ayaa ku bilaabantay Qaab ku dhisan weerar iyo Weerar Celis inkastoo qaybtii hore ee Ciyaarta ay ku Gacan sareeyeen Naadiga Jabuuti City Council waxaana qaybta 1aad lagu kala nastay 26 dhibcood oo keensadeen Kooxda ka socota dalka Jabuuti ,Halka Kooxda Ciidanka Asluubtu ay la Yimaadeen 21 dhibcood.

Markii la isugu soo Noqday qaybtii danbe ee Ciyaarta ayaa Kooxda Kooxda Ciidanka Asluubta waxay dardar la soo gashay garoonka isla markaana waxay wax badan ka bedeleen hanaankii ay markii hore u ciyaarayeen.

Ciyaartaas ayay Guushu ku raacday Kooxda Ciidanka Asluubta oo la Yimid 58 dhibcood halka ay Kooxda ku ciyaarta magaca  Jabuuti City Council ay keensadeen 48 dhibcood.

Kooxda Jabuuti Council ayaa Todobaadkan Ciyaar Saaxiibtimo la Yeeshay Kooxda Ciidanka Qaranka ee Gaashaan oo ka Guulaysatay.

Hargaysa SDN.

Qurbejoog.com