Kooxda Gaashaan ee Kubada Kolayga oo Ciyaar Saaxiibtinimo kaga badiyay Kooxda Jabuuti City Council
Hargaysa 25.Aug 2013 (SDN) Ciyaar Saaxiibtinimo oo Kubada Kolayga ah ayaa waxay galabta ku dhex martay garoonka Timcade ee magaalada hargaysa Kooxda Gaashaan ee Ciidanka Qaranka iyo Naadiga Jabuuti City Council kuna ciyaara magaca golaha deegaanka ee degmada Jabuuti oo Maalmihii u danbeeyey ku sugnaa Caasimada Hargaysa .
Daawashada Ciyaartan waxaa ka soo qayb galay Gudoomiyeyaasha Xidhiidka Kubada Kolayga ee Somaliland iyo Dalka Jabuuti,Saraakiil ka socotay Ciidanka Qarranka ee Somaliland iyo dadweyne aad u tiro badan.
Ciyaarta ayaa ku bilaabantay Qaab ku dhisan weerar iyo Weerar Celis inkastoo qaybtii hore ee Ciyaarta ay ku Gacan sareeyeen Kooxda ku ciyaarta Magaca Ciidanka Qaranka ee Gaashaan waxaana qaybta 1aad lagu kala nastay 25 dhibcood oo ay la yimaadeen Kooxda Gaashaan iyo 17 dhibcood ay keensadeen Kooxda Jabuuti City Council.
Markii la isugu soo Noqday qaybtii danbe ee Ciyaarta ayaa Kooxda Jabuuti City Council waxay dardar la soo gashay garoonka isla markaana waxay wax badan ka bedeleen hanaankii ay markii hore u ciyaarayeen.
Ciyaartaas ayay Guushu ku raacday Kooxda Gaashaan ee Ciidamada Qaranka Somaliland oo la Yimid 44 dhibcood halka ay Kooxda ku ciyaarta magaca Jabuuti City Council ay keensadeen 42 dhibcood.
Kooxda Jabuuti City Council ayaa maalinta Salaasada Ciyaar saaxiibtimo la yeelan doonta Naadiga Ciidanka Asluubta ee Kubada Kollayga .
Hargaysa SDN.