Khaliifka Islaamiyiinta ISIL Oo Soo Diray Cajalad Uu Ku Beeninayo Dilkiisa Oo Hore Loo Baahiyey
Mousil:Nov,14,2014(SDN/QJ)-Khaliifka kooxda Islaamiga ah ee ISIL Abu Bakr al-Baghdadi ayaa soo saaray cajalad maqal ah oo uu soo duubay si uu u beeniyo warar dhawaan Reer Galbeedku Baahiyeen oo sheegayey inuu duqayn ku geeriyooday ama ku dhaawacmay.
Cajalada codka ah oo soconaysa 17 daqiiqo oo laga soo daayay baraha bulshada ayaa uu al-Baqdadi ku sheegay in ay dagaalyahanada IS dagaalka wadayaan illaa qofka ugu dambeeya uu nool yahay.
Hoggaamiyaha ururka IS ayaa sidoo kale ka hadlay arrimo dhacay tan iyo markii weerarka cirka ah ee la sheegay in uu wax ku noqday al-Baqdadi uu dhacay toddobaadkii la soo dhaafay.
Waxaana ka mid ah isagoo ka hadlay go’aanka uu madaxweyne Obama ugu diray ciidamo gaadhaya 1,500 dalka Ciraq, go’aankaa oo soo baxay wax yar kadib weerarka cirka ah ee lagu qaaday Mosul.
Hoggaamiyaha IS ayaa ugu baaqay taageerayaashiisa inay qaadaan weeraro Jihaadi ah oo sida folkaanaha uga qarxa caalamka oo idil. Waxana uu ku tilmaamay Maraykanka iyo huwantiisa inay yihiin kuwa baqanaya,daciif ah oo aan awood lahayn.
Cajaladan ayaa waxaa lagu dalbay in weerar lagu qaado Saudi Arabia iyagoo lagu tilmaamay hogaamiyaasha boqortoyada inay yihiin madaxa maska cunaya caalamka islaamka.
Ururka IS ama dowlada Islaamiga ah ayaa waxa ay maamushaa haatan gobolo badan oo ka mid ah wadamada Ciraq iyo Siiriya waxana ay deegaanada ay ka taliso ku soo rogtay xukunka shareecada Islaamka.
SDN/QJ