Janaraal Ciidan oo ka Caasiyoobay Maamulka Madaxweyne Gaas oo Ladqabe loogu Celiyay Garowe Iyo Shakiga Taagan

Garowe 16.July 2015 (SDN/QJ)- Taliye Ku-xigeenkii hore ee booliska Puntland Gen. Muxiyaddiin Axmed Muuse iyo Taliyihii Hore ee Ciidamada Sirdoonka Puntland (PIA) Cabdi-yare ayaa shalay galab dib ugu laabtay magaalada Garowe oo ay Cadho kaga Maqnaayeen.

Boqollaal dadweyne ah ayaa saraakiishan kusoo dhoweeyey tuulada 22aad, waxaana intaas kadib loo soo gudbiyey labada guri ee ay magaalada Garowe ka deggen yihiin.

Gen. Muxiyadiin oo si kooban war-baahinta ula hadlay ayaa sharraxaad ka bixiyey sababta isaga iyo Cabdi-yare xilligan Garowe u yimaadeen.

Wuxuuna sheegay inay soo ajiibeen codsi uga yimid isimmada Puntland, Ra’isal Wasaaraha Dowladda Federaalka iyo Madaxweynaha Jubaland, codsigaas oo ku aaddanaa inay Garowe soo galaan, si loo sii ambaqaado dadaallada nabadeynta ee todobaadyadii lasoo dhaafay socdey.

Mar la weydiiyey su’aal ahayd “Makuu qorsheysan tahay inaad la kulanto Madaxweyne Gaas?” Wuxuu ku jawaabay “kolley hadda qorshaha taasi kuma jirto, laakiin waa suurogal inaan is aragno”

Su’aaal kale oo ahayd “Garowe masii joogeysaan mise dib ayaad u noqoneysaan?” Wuxuu iyadana kaga jawaabay “taas hadda kama hor dhici karo…inaan joogno ama dib u laabano waxay ku xiran tahay waxa ka soo baxa kulanka aan la qaadan doonno madaxda iyo isimmada”

Muddo labo bilood ku dhow waxaa deegaanka Qarxis ku sugan ciidamo boqollaal gaaraya oo sida ay sheegeen ka gadoodey xuquuq la’aan. Ciidankan waxaa hoggaaminaya Taliye Ku-xigeenkii hore ee booliska Puntland Gen. Muxiyaddiin Axmed Muuse iyo Taliyihii Hore ee Ciidamada Sirdoonka Puntland (PIA) Cabdi-yare.