Guddomiye Faysal oo dhaliilay xukuumada Muuse Biixi

Hargeysa December 24, 2023 (QJ) -Guddoomiyaha Xisbiga Mucaaradka UCID ee Somaliland, Faysal Cali Waraabe, ayaa eedaymo u jeediyay maamulka mudo dhaafka xilka ku sii jooga ee Madaxweyne Muuse Biixi, oo uu ku eedeeyay inay si khaldan u maamushay difaaca Somaliland.

Waxa uu sheegay in colaada ka taagan gobolka Sool si badheedh ah loogu beddelayo dagaal beeleed, waxaanu xukuumadda ku eedeeyay inay xaaladda uga sii dartay, isaga oo u soo jeediyay in haddii xukuumaddu sidan ku sii socoto ay iman karaan khataro soo wajaha xasiloonida Somaliland.

Waxa uu sheegay in colaada ka aloosan gobolka Sool ay ka dhalatay ka dib markii ay xukuumaddu xaalada wax uga qaban wayday sidii loo baahnaa. Faysal waxa uu xukuumadda Somaliland ku eedeeyay inay sii kordhisay xiisadda, waxaanu u soo jeediyay in xaaladdu ay keeni karto dagaal beeleed. Waxa kale oo uu xukuumadda ku dhaliilay inaanay si firfircoon uga qayb qaadan difaacida Somaliland, isagoo ku andacoonaya inaanay lahayn istiraatijiyad cad oo ay ku maarayso colaadaha.

Sidoo kale, Faysal waxa uu caddeeyey in aanay xukuumad ahaan si waafi ah ugu diyaar garoobin doorashooyinka soo socda, isaga oo si toos ah u sheegay in la’aanta qorshe doorasho oo cad ay ka qayb ka tahay caqabadaha hortaagan Somaliland.

Waxa uu ku nuux-nuux saday in loo baahan yahay in si guud oo loo wada dhan yahay loo wajaho arrimaha ka taagan Sool. Waxa uu xukuumadda ku dhaliilay sida muuqata inay ka caga jiidayso inay ogolaato ka qayb-gal ballaadhan iyo wada-hadallo xal loogu raadinayo colaadaha.