Guddida doorashooyinka Soomaaliya oo hogaan doortay

Muqdisho December 02, 2024(QJ) – Guddiga Doorashooyinka Qaranka ayaa maanta oo Isniin ah cod gacan taag ah ku doortay guddoomiyaha iyo ku xigeenkiisa.

Guddoomiyaha guddiga doorashada ayaa loo doortay Cabdikariin Axmed Xasan, isagoo helay 17 cod oo gacan taag ah. Waxaa horey loogu ogaa in uu yahay musharax u taagan xilkan oo ay isku dhow yihiin Madaxweynaha.

Saadaq Abshir Garaad ayaa loo doortay guddoomiye ku xigeenka guddiga doorashooyinka qaranka. Saadi ayaa muddo dheer ka mid ahaa Golaha Wakiilada Puntland.

Guddoomiyaha cusub Cabdikariin ayaa ka mid ah qurbo-joogta Soomaaliyeed, wuxuuna in muddo ah ku noolaa dalka Mareykanka.

Guddigan iyo shuruucdii lagu dhisay ayaa waxaa kasoo horjeeda dowladda Jubaland iyo Puntland oo aan wax talo ah ku lahayn dhismahooda, horayna u diiday dhammaan sharciyadii doorashada.