Golaha Guurtida oo Fadhi deg Deg ah Arbacada Beri isugu Yeedhay Golaha Wakiilada iyo Gudoomiye Saleebaan Gaal oo Beri dalka imanaya

Hargaysa 18.Feb 2014 (SDN)- Golaha Guurtidda Somaliland ayaa maanta qoraal rasmi ah oo ay u gudbiyeen Golaha Wakiiladda ku amray in Fadhi deg deg ah oo ka soo horumaray mudadii ay hore ugu dhawaaqeen in ay Go’aankooda ku soo saarayaan ku sheegay in Berri Goluhu fadhiisto go’aankana ay soo dhigi doonaan.

Sida ay noo Xaqiijiyeen Ilo lagu kalsoon yahay  Golaha wakiiladda qoraalka ka soo gaadhay Guddidii Golaha Guurtidda ayaan xog faahfaahsan laga bixin..

Lama oga in go’aanka Guddida Guurtidda ahi ku lifaaqnaa qoraalkooda iyo in qoraalku ku koobnaa oo kali ah fadhiga ay ku baaqeen oo ay la sugi doonaan go’aankooda Golaweynaha oo isku dhan.

Guddida Golaha Guurtidda ee ku jirtay dhex dhexaadinta Khilaafka Golaha wakiiladda ayaa hore u qabsaday in ay go’aankooda yeedhin doonaan 25-ka bishan oo ku beegnaan lahayd toddobaadka soo socda, balse qoraalkooda maanta oo Duhurnimadii soo baxay ayuun baa lagu war helay.

Illaa hada lama oga go’aanka ay soo saareen dhinaca uu ku ciiri doono iyo in uu noqon doono mid ay labada dhinacba ku wada qanci doonaan, laakiin waxa u damaanad ah wax kasta oo ay soo saaraan in lagu qanci doono Suulkii iyo Saxeexii ay ka qaadeen labadii Guddi ee Garta u dhiibatay oo kala matalaysay shirguddoonka iyo labada Garab ee Golaha.

Hargaysa SDN.

Qurbejoog.com