Golaha Deegaanka Degmada Sallaxley oo doortay Hogaankoodii iyo ka Degmada Bali Gubadle oo Xilkii la Wareegay

 

Hargaysa 29 Dec (SDN)

Gudoomiyaha  Cusub ee Golaha Deegaanka ee  Degmada balligubadle Md Cabdi iimaan Jaamac ayaa maanta si rasmi ah xilkii ugala wareegay Duqii hore ee Degmadaasi Md Ibraahin Colaad.

Munaasabad lagu qabtay Hotel Al-xayaat ee magaaladaasi ayaa waxaa ka qayb galay Gudooiyaha Gobolka Balligubadle Md Jamaal Xuseen Hurre.

Gudoomiyihii  hore ee Degmadaasi Md Ibraahin Colaad. Ayaa uga mahadceliyey dadweynaha balligubadle iyo shaqaalaha dawladda Hoose ee degmadasi sidii ay ula soo shaqeeyeen mudadii uu xilka hayey, isagoo sidoo kalena faahfaahin ka bixiyey waxyaabahii u qabsoomay intii ay xafiiska hayeen.

Maayarka Cusub ee Degmada balligubadle Md Cabdi iimaan ayaa isna ka codsaday shaqaalaha iyo hawlwadeenada kale inay si wanaagsan ula shaqeeyaan si waajibaadka loo doortay ay uga soo baxaan.

Geesta  kalena Gudoomiyaha hay’adda maamul wanaaga iyo la dagaalanka musuqmaasuqa Md Xuseen Cabdilaahi iyo wefti balaadhan oo uu hogaaminayo oo kormeer shaqo ku jooga degmada balligubadle ayaa kulamo xidhiidh ah waxa ay  la yeesheen guud ahaan isu duwayaasha wasaaradaha iyo  hay’adaha dawladda ee Gobolkaasi.

Dhinaca kale Gudoomiye ku xigeenka hay’ada Maamul Wanaag iyo la dagaalanka Musuq maasuqa Yuusuf C.laahi iyo Xubno uu hogaaminayo ayaa maanta kulan kula yeeshay xafiiska Gudoomiyaha Gobolka Hawd madaxda laamaha dawlada waxaanu warbixin ka dhagaystay maamulka gobolka iyo ka degmada bali gubadle .

Gudoomiyaha Gobolka Hawd Jamaal Xuseen Hure ayaa dhiniciisa ka waramay waxyaabaha gobolka u qabsoomay iyo caqabadaha la soo dersay waxaanu xusay inay soo dhawaynayaan Mas’uuliyiinta ka socda Komiishanka Maamul wanaaga iyo la dagaalanka Musuq Maasuqa,waxa uu Gudoomiyuhu tilmaamay oo kale hay’adaha dawlada ee sida tooska ah uga hawl gala gobolka hawd isagoo intaas ku daray inay waxyaabo badani u hirgaleen muddadii uu joogay.

Maayarka Cusub ee Magaalada Bali Gubadle Cabdi Iimaan Jaamac ayaa ka waramay waxyaabaha u qorshaysan golaha deegaanka ee uu hogaamiyo.

Waxaa kale oo kulankaas goob jooog ka ahaa Taliyaha Qaybta Booliska ee Gobolka Hawd Mahad Shaqale.

Golaha Deegaanka ee degmada Sallaxley ayaa Kalfadhigoodii u horeeyay ee ay yeesheen lagu dhaariyay isla markaana ku doortay Maayar iyo Maayar xigeen.

Fadhigan waxaa Goob joog ka ahaa Gudoomiyaha Gobolka Maroodi Jeex Axmed Cumar Xaaji C.laahi Xamarje,iyo Xoghayaha Maamulka Gobolka Xamse Ciise Cabdi .

Wakiilka Gudoomiyaha Maxkamada Degmada Sallaxley ayaa si rasmi ah u dhaariyay Xildhibaanada Golaha deegaanka waxaana markaas kadib ay iska dhex doorteen Xubintii ugu da’da weynayd oo Shirka u  gudoomisay.

Mudanayaasha Golaha deegaanka ee degmada Sallaxley waxay Cod gacan taag ah ugu doorteen Gudoomiyaha Degmadaasi Maxamed Ibraahin Xandule halka ay ku xigeena u doorteen Naasir Cabdi Iimaan .

Gudoomiyaha Gobolka Maroodi Jeex Axmed Cumar Xaaji C.laahi Xamarje ayaa sheegay in doorashadaasi u dhacday si waafaqsan Xeerka Gobolada iyo Degmooyinka waxaanu kula dardaarmay Mas’uuliyiinta la doortay inay si xilkasnimo leh ugu adeegaan dadkooda iyo degmadooda.

Sidoo kale Gudoomiyaha Cussub ee degmada Sallaxley Maxamed Ibraahin Xandule iyo ku xigeenkiisa Naasir Cabdi Iimaan,ayaa halkaasi ka balan qaaday inay si wadaniyad leh ugu shaqaynayaan horumarinta degmada Sallaxley.

Hargaysa SDN