Faah Faahin: Qarax Qasaaro Geystay oo ka dhacay Magaalada Diinsoor ee gobolka Baay

Diinsoor March 20 2013 (SDN)— Warar dheeraad ah ayaa kasoo baxaya khasaaraha ka dhashay qarax xoogan oo xalay laga maqlay bartamaha Magaalada Diinsoor ee Gobalka Baay.

Dadka deegaanka ayaa sheegay in dhawaqa qarax aad uxoogan ay maqleen xalay fiidkii iyadoo qaraxaasi ay moodeen mid cirka laga soo tuuray oo diyaarad ay soo riday hayeeshe aysan arini sidaa noqon.

Goob geerish ah oo ay leeyihiin Al-Shabaab ayaa lasoo wariyay inuu ka qarxay qaraxa iyadoo gaari lagu diyaarinaye waxyaabaha qarxa uu qarxay kadibna halkaasi rag ka tirsan Shabaab dhimasho iyo dhaawac ay kasoo gaartay.

Inkastoo aan si dhab ah loo xaqiijin karin tirada Shabaabka ku geeriyootay qaraxaasi ay diyaarinayeen ayaa hadana dadka deegaanka waxa ay sheegeen inuu jiro khasaaro dhimasho iyo dhaawac badan oo Shabaab soo gaaray.

Guddoomiyaha Degmada Diinsoor ee Dowladda Soomaaliya ayaa sheegay in nooca qaraxa uu ahaa gaari waxyaabaha qarxa laga buuxiyay oo ay Shabaab diyaarinayeen oo iyaga ku qarxay.

Wuxuu sheegay in 10-ruux oo Shabaab ah ay ku geeriyoodeen qaraxaasi halka sidoo kale 9-kale la dhigay bartamaha isbitaalka Magaalada Diinsoor ee Gobalkaasi Baay.

Al-Shabaab saraakiishooda ilaa iyo iminka kama aysan hadlin qaraxa ay diyaarinayeen ee ku qarxay iyo sidoo kale khasaaraha ka dhashay qaraxaasi,laakiin daganayaan dagan Degmada Diinsoor ayaa xaqiijiyay in Shabaab xalay Bandoow ka dhigeen magaalada.

SDN-Diinsoor