Diyaarado dagaal oo duqeyn ka geystay deegaano ka tirsan gobolka Gedo

Garbahaarey Feb 01 2013 (SDN)— Diyaarado dagaal ayaa xalay duqeyn ka geystay duleedka Magaalada Garbahaarey ee gobolka Gedo sid ay maamulka degmadaasi xaqiijiyeen.

Diyaaradahan dagaal oo ay leeyihiin dowladdaha dariska ayaa maamulka waxa ay sheegeen in ay bartilmaameedsadeen fariisimo ay Al Shabaab ku leeyihiin deegaano u dhaw Garbahaarey.

Maamulka Gedo ayaa sheegay in duqeynta ay ka dhacday deegaano ay ka midtahay Xashlow oo duleedka ka ah Buurdhuubo waxana uu sheegay in gaadiid dagaal halkaasi looga gubay Al Shabaab.

Majiraan ilo Madaxbanaan oo xaqiijinaya qasaaraha ka dhashay duqeynta diiyaarahan dagaal mana jiraan wax war ah oo ka soo baxay AL Shabaab oo duqeyntan ku aadan.

Dhanka kale wafdi ka socda Qaramada Midoobay ayaa gaaray gobolkaasi waxana ay kulamo looga hadlayo amaanka iyo xaaladaha nonoleed ee gobolka la qaateen mas’uuuliyiinta maamulkaasi.

SDN-Garbahaarey