Dagaal Xooggan Oo Degmada Yaaqshiid ku Dhex Maray Shabaabka iyo Ciidanka Dawladda
Muqdisho:May,21,2014(SDN/QJ)-Iska hor-imaad Xooggan ayaa Habeenkii xalay Magaalada Muqdisho ku dhex maray Xoogaga Al-shabaab iyo ciidamda ASIMOS iyo kuwa Dawladda Federalka oo isku dhinac ah.
Dagaalka ayaa waxa uu ka dhacay degmada Yaaqshiid iyadoo dagaalkaas ay soo qaadeen ciidanka ka tirsan Shabaab kuwaas oo badhtilmaameedkooda uu ahaa Saldhiga Yaaqshiid balse ciidamo meel u dhaw saldhiga fadhiisimo ku lahaa ayay Al-Shabaab isku dhaceen isla markaana dagaal xoogan ayaa halkaas ka dhacay.
Dagaalka ayaa ku bilaawday qoriga Baasuukaha ah ka dibna rasaas caadi ah ayaa bilaabatay iyadoo daqiiqado ka dibna uu dagaalka joogsaday waxaana halkaas is kaga cararay kooxihii dagaalka soo qaaday.
Xaalada ayaa iminka degan lamana sheegin wax khasaara ah oo ka dhashay dagaalkii xalay ka dhacay degmada Yaaqshiid iyadoo inta badan Shabaab ay weerar ugu soo qaadeen sidan oo kale degmada Yaaqshiid.
Kooxaha Shabaabka ayaa muddooyinkan dambe weeraro isdaba jooga ah ku soo qaadayey Goobo ku yaalla Magaalada Muqdisho, iyagoo Habeen horena duqayn dad ku dhinteen u geystay qaybo ka mid ah Magaalada Muqdisho.
SDN/QJ