Cabdiraxmaan Cirro oo ku guuleystay Doorashadii Madaxtooyada Somaliland

Hargeysa November 19, 2024(QJ) Guddiga doorashooyinka Somaliland ayaa goordhaweyd ku dhawaaqay in musharaxa xisbiga mucaaradka ah ee Waddani, Mudane Cabdiraxmaan Cirro uu ku guulaystay doorashada madaxtinimada Somaliland.

Murrashax Cabdiraxmaan Cirro ayaa guul taariikhi ah ka soo hooyey doorashadii 13-kii bishan ka qabsoontay dalka, isaga oo helay codad aad uga badan kuwii uu la tartamayey ee ahaa Madaxweynaha talada haya ee Muuse Biixi Cabdi.

Sidoo kale, doorashooyinkii ururada siyaasadda waxa ku soo baxay saddex xisbi oo kala ah xisbiga Waddani oo hadda la wareegay talada Somaliland, xisbiga Kaah iyo xisbiga talada dalka haya ee Kulmiye. Xisbiga UCID ee uu hoggaamiyo Feysal Waraabe ayaa labada doorashoba ku guuldareystay.

Xisbiga Kulmiye iyo murrashaxa Muuse Biixi Cabdi, ayaa guul-darro xanuun badan kala kulmay, ka dib markii shacabka Somaliland ay sannadkan go’aansadeen inay isbedel ku sameeyaan, taas oo keentay inuu xisbiga Waddani ku guulaysto doorashadii dhawaan dhacday.