Beesha Caalamka oo bogaadisay doorashooyinkii Puntland

Muqdisho January 09, 2024 (QJ) -Saaxiibada Soomaaliya ee caalamka ayaa soo dhaweeyay doorashadii madaxtinimada ee shalay ka dhacday Puntland. Waxa ay bogaadiyeen sida ay Puntland si nabad ah ugu qabsatay hannaanka doorashada.

Saaxiibada caalamiga ah ee Soomaaliya ayaa bogaadiyay dadaalka dhammaan daneeyayaasha doorashada. Waxay dhiiri galiyeen khilaaf kasta oo la xidhiidha doorashada in lagu xaliyo habraac sharci oo ku haboon.

Saaxiibada caalamiga ah waxa ay dhiirigelinayaan ka qaybgalka haweenka iyo dhallinyaradu ka qaadanayaan geeddi-socodka siyaasadda iyo doorashooyinka, iyaga oo hoosta ka xariiqaya doorkooda muhiimka ah ee qaabaynta mustaqbalka. Saaxiibada caalamku waxay dib u xaqiijiyeen inay taageerayaan geeddi-socodka dimuqraadiyadda Soomaaliya, iyada oo ujeedadu tahay in la helo doorasho caddaalad ah, daahfuran, oo loo dhan yahay.