Al Shabaab oo laga saaray degaano hoostaga Janaale

Janaale December 16, 2023 (QJ) -Ciidanka Xoogga dalka Soomaaliyeed gaar ahaan guutada 83-aad iyo kuwa NISA ayaa si wadajir ah howlgal qorsheysan waxa ay uga fuliyeen xaafado ka tirsan degmada Jannaale ee gobolka Shabeellaha Hoose.

Tuulooyinka la beegsaday ayaa waxaa ka mid ahaa Buule-arundi, Malable, Beeraha-baay, iyo Busley-daa’uud. Ciidamada xoogga dalka ayaa ku guuleystay in ay la wareegaan fariisimo muhiim ah oo ay ku sugnaayeen Al-Shabaab, waxaana la sheegay in uu go’ay xiriirkii labada dhinac. Maleeshiyada Al-Shabaab ayaa tuulooyinkan u isticmaali jiray saldhigyo.

Howlgalka ayaa ujeedkiisu ahaa in lagu wiiqo awoodda Al-shabaab ee gobolka iyo sare u qaadista ammaanka. Ciidamada dowladda Soomaaliya oo ay wehliyaan saaxiibada caalamka ayaa sii wada ka hortaga qatarta Al-Shabaab si loo xaqiijiyo amaanka iyo xasiloonida gobolka.