Abuu Mansuur Al Amriki Oo Ka badbaaday Isku Day Dil

Muqdisho April 26 2013 (SDN)— Qoraal iyo sawiro uu soo dhigay barta uu sida weyn u adeegsado Abu Mansuur Al-Amriki ee Twitter,ka ayaa waxaa uu ku sheegay inuu ka bad baaday isku day dil oo la doonayay in lagu qaarajiyo.

Abu Mansuur oo sidoo kalena la yiraahdo Cumar Xamaami ayaa waxaa uu sheegay in koox hubeysan ay damceen inay dilaan hase ahaatee uu ka bad baaday waxaa uu sheegay inay dhawr xabadood uga dhaaceen dhanka qoorta.

Sawirada uu  Twetter,kiisa soo galiyay Abu Mansuur oo u dhashay dalka Maraykanka waxaa ka muuqanaya dhaacayo kasoo gaaray dhanka qoorta hase ahaatee waxaa uu sheegay inuu noolyahay oo uu waliba caafimaad qabo sida uu yiri.

“Waxay doonayeen inay i dilaan Alle mahadiis laakiin dhagar qabayaal ayay ahaayeen” ayuu ku yiri qoraalka uu ku qoray boggiisa Twetter,kiisa.

Abu Mansuur Al-Amriki oo u dhashay dalka Maraykanka waxaa uu ka mid yahay Ragga aan Soomaalida aheyn ee Shabab ku jira inkastoo ay dhawaan Shababku sheegeen inay shaqada ka cayriyeen.

Dhawr jeer ayuu Al-Amriki sheegay inay u hanjabeen xubno ka tirsan Xarakadda Al-Shabab waxaana uu ka mid yahay dad ay dawlada Maraykanku ay lacago ku doon doonayaan.

SDN-Muqdisho