Faah Faahin: Dagaal qasaaro geystay oo ka dhacay duleedka Magaalada Jowhar

Jowhar May 27 2013 (SDN)— Ciidamada dowladda oo gacan ka helaya AMISOM iyo AL Shabaab ayaa lagu soo waramayaa in ay ku dagaalameen duleedka Magaalada Jowhar ee Xarunta gobolka Sh/dhexe.

Dagaalka oo xalay dhacay ayaa waxaa la sheegay in ay soo qaadeen ciidamo ka tirsanaa Al Shabaab oo kuwaasi oo weerarka ku ekeeyay Garoonka diyaaradaha Jowhar oo qiyaastii 18-km Magaalada u jira.

Dad ka agdhaw goobta ayaa warbaahinta u sheegay in dagaalku uu ahaa mid xoogan oo hub culus la isku adeegsaday laakiin waxaan laga war heyn qasaaraha ka dhashay.

Mas’uuliyiinta dowladda ee gobolka Sh/dhexe oo aan la xiriirnay ayaa ka gaabsaday in ay ka hadlaan dagaalka, hase ahaatee waxaa wararku ay tilmaamayaan in uu jiro qasaaro ka dhashay dagaalkaasi.

Majiro war ka soo baxay dhinacaydii dagaalamay dowladda, AMISOM iyo Al Shabaab, laakiin waxaa la rumeysan yahay in labada dhinac ee dagaalamay uu qasaaro soo gaaray.

SDN-Jowhar