Maayarka Caasimada oo Xadhiga ka Jaray Dhisme Biriij laga Hirgaliyay Xaafada Maxamed Mooge
Hargaysa 17.May (SDN) Duqa Caasimada Hargaysa C.raxmaan Maxamud Caydiid Solteco ayaa Xadhiga ka jaray Biriij laga Hirgaliyay Xaafada Maxamed Mooge ee caasimada hargaysa.
Munaasibada Xadhiga lagaga jarayay Biriijkan waxaa kale oo ka qayb galay Madax iyo mas’uuliyiin ka tirsan Golayaasha Qaranka ,iyo Ururrada Bulshada .
Gudida dhismaha Biriijkan ayaa ka waramay Maraaxilkii kala duwanaa ee dhismaha Biriijkani soo maray iyagoo sheegay inuu mudo sannad ah qaatay dhismihiisu waxaa kale oo ay Gudidu Xuseen in dhaqaalaha ku baxay dhismaha Biriijkani uu gaadhayo Lix iyo Afartan kun oo dollar isla markaana ay iska soo uruuriyeen dadweyanaha,Ganacsatada,dawlada hoose iyo Iskaashada basaska ee xaafadaas u kala goosha.
Xildhibaan Maxamed Maxamuud Dheeg oo ka tirsan mudanayaasha Golaha Guurtida, oo halkaasi ka hadlay ayaa Soo dhaweeyay dhamaystirka Biriijkan oo wax weyn ka tari doona isu socodka dadka iyo gaadiidka .
Marwo Faadumo Siciid Ibraahin oo ka mid ahayd aasaasayaashii bud-dhiga u ahaa hirgalinta Biriijkan ayaa Wax lagu farxo ku tilmaantay in Maanta uu soo dhamaystirmay Biriijkan waxaanay Sheegtay baahida loo qabo sidii loogu samayn lahaa Goobaha Biyo mareenada ah ee dadku kala kulmaan dhibaatada buundooyin fududeeya isu socodka dadka iyo gaadiidka .
Maayarka Caasimada Hargaysa Mudane C,raxmaan Maxamud Caydiid oo gaba gabadii xadhig ka jarista Biriijkaas ka hadlay ayaa iftiimiyay iskaashiga bulshada iyo Maamulku inuu keeni karo horumar dhinac walba ah,Waxa uu Maayarku u mahadceliyay Cidkasta oo ka qayb qaadatay hirgalinta biriijkan oo door Mug leh ka ciyaari doona isku socodka iyo horumarka ay Xaafada Maxamed Mooge higsanayso.
Maayarka caasimadu waxa uu intaas ku daray in dawlada hoose ee caasimadu ay ku hawlan tahay samaynta iyo dayac tirka Wadooyinka Caasimada hargaysa,waxaa kale oo sheegay in Mudadii ay Golahooda Deegaanku xilka hayeen wadada keliya ee dhamaatay ay tahay ta xaafada Maxamed Mooge.
Dhinaca kale Maayarka Caasimada Hargaysa C.raxmaan Maxamud Caydiid waxa uu dhagax dhigay Buundo laga hirgalinayo isla xaafada Maxamed Mooge,taas oo ay bixinayaan Wixii dhaqaale ah ee Maamulka Caasimada hargaysa kaga soo hagaagay.
Hargaysa SDN.
Qurbejoog.com