Xukuumadda Oo Marmarsiiyo Caqli-xumo ah U Samaysay Baaxaaddega Sarrifka, Shirkadda TELESOM-na Kula Gal-galatay Sicir Bararka Maciishadda
Hargeysa May 02,2013(SDN/Hubaal)-Xukuumadda Somaliland ayaa Baaxaa-degga Qiimaha Doolarka iyo Sicir bararka baahsan ee ku yimi sarrifka lacagaha kula gal-gashay adeega shirkadda TELESOM u adeegsato dhinaca xawillaada lacagaha ee ZAAD-ka, kaas oo xukuumaddu ku andacootay inuu qayb ka qaatay kor u kaca qiimaha doolarka.
Guddoomiyaha Bangiga dhexe ee Somaliland Cabdi Dirir Cabdi ayaa adeega ZAAD-ka ku tilmaamay Bangi Electronic ah oo sharci darro ku dhisan isaga oo ka faa’iidaystay khalkhal dhinaca sharciga maalliyada ah.
Guddoomiyaha Bangiga dhexe oo shalay hor tegey golaha wakiillada Somaliland ayaa sheegay in ay ka xukuumad ahaan joojin doonaan dhaqdhaqaaqa adeegan isla markaana Wada hadal ka yeesheen shirkadda TELESOM, sidii Nidaamka saxda ah loogu dhiqi lahaa Adeegsan, isaga oo ku dooday inuu qayb laxaad leh ka qaadan karo hoos u dhaca sicir bararka.
“Shirkadaas waxaanu u sheegnay inay arrintan ay wadaan tahay Electornic Banking kana dhalatay sharci darradii ka jirtay qaybta adeega maaliyadda iyo lacagaha” sdaa ayuu yidhi Cabdi Dirir Cabdi Guddoomiyaha Bangiga dhexe ee JSL. Ugu horeynse, Fadhigii shalay ee Golaha wakiilada Somaliland oo uu shir Gudoominayey gudoomiye ku xigeenka koowaad ee golaha wakiilada Baashe Maxamed Faarax ayaa waxa ay mudanayaashu gudoomiyaha Baanka wax ka waydiiyeen hawlaha uu baanku u qaabilsan yahay dalka.
Ugu horayn Guddoomiyaha Baanka dhexe ee Somaliland Cabdi Dirir Cabdi ayaa warbixinta uu siiyey mudanayaasha Golaha wakiilada waxa uu kaga hadlay waxqabadii Baanka ee saddexdii bilood ee u danbeeyey ay ku hawlanayeen, isaga oo tilmaamay inay mudooyinkii ugu danbeeyey la dagaalamayeen sixir bararka ku yimid qiimaha doolarka waxaanu yidhi, “Waxaan ka hadlayaa arimihii u waa weynaa ee sadexdii bilood ee u danbeeyey aanu galnay iyo wixii nooga qabsoomay, arinta ugu horaysa waxa weeye inaanu sadexdii bilood ee ugu danbeeyey la lagaalamaynay sixir bararkii ka yimid doolarka oo sare u kacay sidii aanu u dajin lahayna, sadex Toddobaad ka hor doolarku waxa uu ahaa 7250 shilinka Somaliland ah maantana waxa uu taagan yahay 6700 markaa waa la dareemi karaa is badelka aanu arintaas ka samaynay joojinna mayno ilaa aanu gaadhsiino sixir macquula.”
Gudoomiyaha Baanka Dhexe Ee Somaliland Cabdi Dirir Cabdi oo hadalkiisa sii wata ayaa intaas raaciyey, “Doolarku sanadihii hore waxa u dhici jiray wakhtiga aynu xoolaha dirno sanadkan wax ayaa iska bedelay arintaas oo xoolihii laynaga iibsan jiray sidii hore may ahayn sanadkan, dadka xoolaha ka ganacsadaana waxay ka soo iibsadeen kilalka shanaad ee dalka itoobiya iyo koonfurta, doolarku waxa uu gaadhi jiray wakhtiyadii hore 6200 shilinka Somaliland ah sanadkan marka laga bilaabo wakhtigii xoolaha la dirayey waxa uu gaadhay 6500 dabadeedna kor ayuu u sii kacay arinta keentayna waxay ahayd doolarka oo ku yaraaday suuqyadeen.”
Sidoo kale Guddoomiyaha baanka dhexe ee Somaliland waxa uu ka hadlay kulamo uu sheegay inay la yeesheen masuuliyiinta shirkadda isgaadhsiinta ee Telesom isaga oo tilmaamay inay ka wada hadleen sidii wax ka badal loogu samayn lahaa adeega shirkadaas ee Zaad-ka, waxaanu tilmamaay inay shirkadaas isku af garteen arimihii ay ka wada hadlayeen, “Waxaanu la kulanay shirkada Telesom annaga oo ka wada hadlayna arrinta Zaad-ka oo aanu is leenahay saamayn ayey ku leedahay sixirka doolarka ee kor u kacay, shirkadaasna waxaanu u sheegnay inay arrintan ay wadaan tahay Electornic Banking kana dhalatay sharci darradii ka jirtay qaybta adeega maaliyadda iyo lacagaha sharcigaasina aanu sii socon doonin, annaga oo rajaynayna in adeega Zaad-ku aanu ku sii shaqayn doonin nidaamka isku bedelka lacagaha oo uu sidaa ku sii socdo haddii aanay shirkadda Telesom tallaabo qaadin oo aanay samayn Bangi uu Zaad-ku hoos yimaado” sidaa ayuu yidhi guddoomiyuhu, waxaanu intaa ku daray,”Zaad-ku waa Electronic Banking lacag fara badan oo dibada inaga soo gashana waxaanu qabnaa inay ku wareegayso xisaabaadka uu Zaad-ku leeyahay, taas oo keenta inuu doolar fara badani gacmaha Zaad-ka isku waydaarto taas oo aanu aamin sanahay inay wax yeeli karto doolarka suuqa soo galaya. Waxaanu ku nidhi (Telesaom) arintaasi mid aanu idinka yeelayno maaha, waxaanan rabnaa inaad hore u soo kacdaan oo aad samaysaan Bangi uu Zaad-ku hoos yimaado waanay naga yeeleen waxaanay sheegeen inay doonayaan inay Bangi samaystaan”.
Sidoo kale Guddoomiyaha baanku waxa uu ka hadlay qorshe ay ku doonayaan inay ku furaan baananka ganacsiga, isaga oo tilmaamay inay dhawaan hir gelin doonaan, waxaana uu yidhi, “Waxaanu doonaynaa inaanu furno nidaamka Baanka ganacsiga maadaama oo aanay jirin dad khibrad u leh nidaamka baanka ganacsiyada waxaanu baanka aduunka waydiisanay inay noo tababaraan dad khibrad u leh oo maamula baananka ganacsiga, waanay naga aqbaleen tababarkiina intiisa badani wuu soo dhamaaday oo gaba gabo ayuu ku dhaw yahay”. Dhinaca kale Guddoomiyaha Baanka dhexe ee Somaliland Cabdi Dirir Cabdi ayey mudanayaasha Golaha Wakiiladu su’aalo ka waydiiyeen warbixintiisa isaga oo dhamaantood uga jawaabay.
SDN-Hargeysa
contact@somalidiasporanews.com