Kooxda Kubada Cagta ee Wasaarada Duulista oo Ku Guulaysatay Tartankii Kooxaha Heerka Kowaad

Hargeysa  29 March (SDN) – Kooxda Kubada Cagta ee Wasaarada Duulista iyo Hawada ayaa galabta ku Guulaysatay Tartankii Kooxaha Heerka Kowaad ee Kubada Cagta oo Mudooyinkii u danbeeyay ka Socday Garoonka Hargiesa Studium, kadib markii ay Ciyaar adag isaga hor yimaadeen Kooxda Nuura-diin.

Munaasibada Gaba gabada Tartankan waxaa ka qayb galay  Wasiirada Wasaaradaha Dhalinyarada,Ciyaarah,Mudane Cali Siciid Raygal, Duulista iyo Hawada Mudane Maxamud Xaashi Cabdi ,Cadaalada Mudane Xuseen Axmed Caydiid ,Agaasimaha Guud ee Wasaarada Ciyaaraha Mustafe Qodax,Taageerayaasha labada Kooxood iyo dadweyne kale.

Tartankan oo ay ka qayb qaadanayeen Sagaal kooxood oo ah heerka kowaad ee Caasimada Hargaysa ka dhisan ayaa Gaba gabadii waxaa Isugu soo hadhay Labada Kooxood ee ku kala Ciyaarayay Wasaarada Duulista iyo Hawada iyo Dugsiyada Nuura diin .

Labadan Kooxood ayaa soo bandhigay Ciyaar aad u qurux badan oo ku dhisan Weerar iyo Weerar Celis,Qaybtii hore ee Ciyaarta ayaan Wax Gool ah la kala dhalin,hasa yeeshee markii lagu soo laabtay Qaybtii labaad ee Ciyaarta waxaa u Suurto gashay Kooxda Duulista iyo Hawada inay la timaado Goolkii kowaad ee Guushu ku raacday taas oo uu Kubad Qurux badan ka faa’iidaytay Ciyaartoyga Xidhan Nombarka 22aad oo lagu magacaabo Muxiyadiin Ducaale Diiriye,Waxaanay Natiijadii Ciyaartu ku dhamaatay hal Gool iyo Eber ay Guusha kula caraabeen Kooxda Duulista iyo Hawada .

Wasiirka Dhalinyarada,Ciyaaraha Mudane Cali Siciid Raygal,iyo Wasiirka  Duulista iyo hawada  Mudane Maxamud Xaashi Cabdi oo hadal ka jeediyay Madashii Gudoonsiinta Koobka Tartanka iyo abaal marinada kala duwan ayaa Tilmaamay in Ciyaaruhu yihiin kuwo fududeeya is dhex galka Bulshada waxaanay amaan u soo jeediyeen dhamaanba Kooxihii ka qayb qaadanayay Tartankani Mudadii uu Socday iyo taageerayaashoodaba.

Wasiirka Ciyaaraha ayaa Sheegay in labada kooxood ee Tartankan lagu soo gabo gabeeyay ay Guulaysteen isagoo intaas ku daray inay soo Socdaan Tartamo kale oo Xiiso badan kana mid yahay Tartanka Ciyaaraha Gobolada dalka.

Maamulaha Guud ee Dugsiyada Nuura-diin Mahad Ibraahin Maxamed ayaa dhiniciisa ka sheegay inuu ku qanacsan yahay Natiijada ay Ciyaartu ku dhamaatay isla markaana uu u hambalyaynayo Kooxda Tartankan ku Guulaysatay waxaanu intaas ku daray inay ku rajo weyn yihiin in kooxdoodu ay ku guulaysan doonto tartamada soo socda.

Hargaysa SDN.

qurbe joog@gmail.com