Ra’iisul wasaare Saacdi Faarax iyo Wafdi uu hogaaminayo oo gaaray Magaalada Cadaado ee gobolka Galgaduud

Cadaado March 06 2013 (SDN)— Wararka ka imaanaya  Magaalada Cadaado ee Maamulka Ximan iyo Xeeb ayaa sheegaya in halkaas uu gaaray Ra’iisul Wasaaraha dowlada Soomaaliya Dr Cabdi Faarax Shirdoon Saacid.

Ra’iisul Wasaaraha ayaa waxaa safarkiisa ku wehlinaya xubno katirsan xukumadiisa sida wasiirada Gaashaandhiga, Arimaha gudaha iyo masuuliyiin kale oo barlamaanka Soomaaliya katirsan.

Wafdigan ayaa magaalada Cadaado ku tagay duulimaad dhanka cirka ah ama diyaarad iyadoo Magaalada ay kaga horeeyeen xubno ugogol xaarayay soo dhaweynta Ra’iisul wasaaraha Jamhuuriyada Soomaaliya.

Qeybaha kala duwan ee bulshada Magaalada Cadaado ayaa si weyn usoo dhaweeyay wafdiga Ra’iusl Wasaaraha dowlada Soomaaliya iyadoo maamulka Ximan iyo Xeeb madaxdiisii ay ka qeyb qaadanayaan soo dhaweynta.

Waa Magaaladii sedexaad ee Ra’iisul Wasaaraha uu booqasho ku tago todobaadkan isagoo tagay magaalada Dhuuso-mareeb ee Xarunta gobolka Galgaduud iyo degmada Caabud-Waaq.

Warar kala duwan ayaa sheegaya in Ra’iisul wasaaraha uu dib ugu soo laabanayo Muqdisho halka kuwo kalana ay sheegayaan in laga yaabo in uu tago Magaalada Galkacyo ee gobolka Mudug.

SDN-Cadaado