Meydka Wiil daldalan oo maanta laga helay duleedka Magaalada Garoowe ee caasimada gobolka Nugaal

Garoowe Feb 27 2013 (SDN)— Sida ay sheegayaan wararka ka imaanaya Magaalada Garoowe ee Maamulka Puntland, waxaa maanta Magaaladaasi duleedkeeda lagu arkay meydka wiil dhalinyaro oo daldalnaa.

Wararka ayaa sheegaya in wiilkaan dhalinyarada ah in isaga oo meyd ah lagu arkay duleedka Garoowe, iyadoo aan lakala cadeyn karin inuu isdaldalay iyo sidoo kale in la dilay oo la daldalay.

Taliyaha qaybta Booliska Gobolka Nugaal Gaashaanle Faarax Galangooli oo ka hadlay wiilkaan dhalinyarada ah ee la daldalay ayaa sheegay inay iminka wadaan baaritaano ku aadan cidii ka dambeysay dilka wiilkaan loo geestay.

Wuxuu sheegay in meydka wiilka dhalinyarada ah gacmaha laga xiray kadibna la daldalay isaga oo intaa hadalkiisa raaciyay inay hayaan iminka raadad muujinaya cidii ka dambeysay dilka wiilkaasi.

Arintani ayaa ku cusub deeganada uu ka arimiyo maamulka Puntland iyadoo aan horay loogu arag duleedka Magaaladaasi meydka wiil dhalinyaro ah oo la daldalay.

Shacabka Soomaaliyeed ayaa inbadan maqlay dilal kala duwan oo loo geestay dhalinyaro Soomaaliyeed iyadoo kooxaha dilalka geesta ay ka baxsadaan goobaha ay dilka ka geestaan.

SDN-Garoowe