Madaxweynaha Somaliland iyo Hogaamiyaha SSC oo heshiis nabadeed kuwada saxeexay Dubai

Dubai. 01, July 2012 (Qurbejoog)- Madaxwaynaha Somaliland Md Axmed Maxamed Maxamuud (Siilaanyo) ayaa heshiis nabadgalyo la saxeexday Hogaamiyaha Kooxda SSC oo in muddo ah dhibaatooyin amaan daro ka waday deegaanada Gobolka iyo Buuhoodle ee Somaliland.

Madaxwayne Siilaanyo iyo Saleebaan Ciise Xaglo-toosiye oo maanta kulan ku yeeshay Magaaladda Dubai ayaa isku afgartay in nabadgalyada deegaanada Sool iyo Buuhoodle laga wada shaqeeyo sida lagu sheegay War-saxaafadeed uu soo saaray afhayeenka Madaxtooyadda Somaliland Cabdilaahi Maxamed Daahir (Cukuse), kaasi oo u dhignaa sidan “Madaxweynaha Jamhuuriyada Somaliland, Mudane, Axmed Maxamed Maxamuud (Siilaanyo) Waxa uu maanta ku qaabiley Qasriga uu degan yahay ee MINA-SALAAMA HOTEL, Hogaamiyaha Kooxdii SSC, Saleebaan Ciise Axmed Kaar (Xaglatoosiye).

Madaxweynaha iyo Gudoomiyaha SSC waxay ka wada hadleen sidii deegaanada Buuhoodle iyo qaybo ka mida Sool loogu soo dabaali-lahaa nabad-gelyo buuxda oo taam ah.

Madaxweynaha iyo Gudoomiyuhu waxay istu-seen isla markaana kuwada Qanceen baahida ay shacbiga deegaanadaasi u qabaan in ay walaalahooda dalka ee kale la wadaagaan horumarka dhanwalba leh ee wax-barashada, Caafimaadka, Nabad-gelyada iyo Adeeg-yada kale ee ay noloshu u baahan tahay oo dhan, sida biyaha Iwm.

Ugu danbayn waxa uu Madaxweynuhu balan qaaday inuu dhiniciisa soo dhawaynayo dedaalka lagu soo Af-jarayo khilaafka jira oo dhan, wuxuuna hogaamiyaha SSC-da kula dar-daarmay inuu si dhakhso ah uga hawl-galo.

Saleebaan Ciise Axmed Kaar (Xaglatoosiye)na waxa uu balan qaaday inuu ka hawl-gelayo sidii khilaafka loo soo Af-jari lahaa, waxaanu sheegay inay reer soomaaliland yihiin dad wada dhashay oo aan sinaba u kala maarmaynin, Dantuna ay ku jirto wax-wada qabsiga iyo wada jirka”.

Qurbejoog, Dubai