Wasiir Fiqi ayaa si aan gabasho lahayn u diiday sheegashada dhuleed ee Itoobiya

NY October 04, 2024(QJ)-Wasiirka Arrimaha Dibadda Soomaaliya Mudane Axmed Macalin Fiqi oo khudbad dhinacyo badan taabaneysa ka jeediyay Golaha Ammaanka ee Qaramada Midoobay ayaa ka hadlay wadatashiyada qaran ee Soomaaliya ka socda oo uu hoggaaminayo Madaxweyne Xsan Sheekh Maxamuud.

Wasiir Fiqi ayaa si aan gabasho lahayn u diiday sheegashada dhuleed ee Itoobiya, isagoo ku eedeeyay inay ka faa’iidaysanayso dadaallada la dagaalanka argagixisada oo ay ku doonayso inay ku qabsato dhulka Soomaaliyeed. Waxa kale oo uu xusay in la qabtay hub sharci-darro ah oo ka yimid Itoobiya, kuwaas oo hurinaya colaadaha beelaha, awoodna u siinaya kooxaha xagjirka ah inay xoogaystaan. Tallaabooyinkaas ayuu ku tilmaamay kuwo si cad loogu xad-gudbay Qaranimada Soomaaliya.

Sidoo kale, Wasiirka ayaa caddeeyay in Soomaaliya ay garab taagan tahay ciidamada Midowga Afrika ee AMISOM, wuxuuna caddeeyay dadaalka xooggan ee lagula jiro Al-Shabaab iyo Daacish. Wuxuu xaqiijiyay in adeegyada dowladda la gaarsiiyay goobaha la xoreeyay, wuxuuna carrabka ku dhuftay in Soomaaliya ay ka go’an tahay inay la shaqeyso Qaramada Midoobay si loo maareeyo marxaladaha xasaasiga ah, gaar ahaan dhinacyada ammaanka iyo dowladnimada.

Khudbadda Wasiirka ayaa hoosta ka xariiqday dadaalka ay Soomaaliya ugu jirto ilaalinta qaranimadeeda, la dagaallanka hubka sharci darrada ah ee Itoobiya, xoojinta iskaashiga caalamiga ah, iyo hirgelinta dib u habeynta gudaha.