Hogaamiyaha SSC-Khaatumo oo u digay Somaliland

Rome May 21, 2024 (QJ) -Hoggaamiyaha Maamulka SSC-Khaatumo C/qaadir Axmed Aw Cali Firdhiye, ayaa Somaliland uga digay inay colaad hor leh ka abuurto deegaanada SSC-Khaatumo, isagoo sheegay in ciidamadoodu ay u diyaarsan yihiin inay difaacdaan deegaanadooda.

Firdhiye oo hadda ku sugan dalka Talyaaniga ayaa khudbad u jeediyay qurbajoogta SSC-Khaatumo ee ku sugan magaalada Rome, wuxuuna u sheegay haddii maamulka Somaliland mar kale soo weeraraan deegaannadooda inay la kulmi doonaan iska caabin adag oo la mid ah iska hor imaadyadii hore.

Somaliland ayaa dhawaan sheegtay inay doonayso inay dib u soo ceshato deegaannadii horay uga dhacay dagaalladii ka dhacay gobolka Sool.

Somaliland iyo SSC-Khaatumo ayaa abaabul ciidan iyo mid dhaqaaleba ka wada deegaamada ay colaaduhu ka jiraan, taas oo walaac ku abuurtay dadka deegaanka ee ku dhaqan gobolladaas.