RW Soomaaliya oo furay Madasha Isku-xirka Horumarinta

Muqdisho March 05, 2024 (QJ) -Ra’iisul Wasaaraha XFS, Xamsa Cabdi Barre, ayaa maanta shir-gudoomiyay Madasha Isku-xirka Horumarinta, iyadoo lagu soo bandhigay waxyaabihii u qabsoomay dowladda, caqabadaha jira, iyo talooyin ku aaddan sidii la isku waafajin lahaa qorshayaasha qaranka iyo barnaamijyada horumarineed ee ay taageerayaan dowladda iyo saaxiibada caalamka.

Ra’iisul Wasaaraha ayaa ku booriyay hay’adaha deeqaha bixiya inay xaqiijiyaan in mashaariicda laga fuliyo dalka ay si dhab ah uga faa’iideystaan shacabka Soomaaliyeed, isagoo hoosta ka xariiqay in si wadajir ah loola xisaabtami doono dhamaan dhinacyada ay quseyso.

Ra’iisul Wasaaraha ayaa tilmaamay in sodonkii sano ee la soo dhaafay ay Soomaaliya dib uga dhacday caalamka, haatanna ay lama huraan tahay in si ka duwan sidii hore iyo si ka duwan sidii hore looga wada shaqeeyo, si guul looga gaaro dadaallada horumarineed.

Madasha ayaa waxaa ka soo qeyb galay mas’uuliyiin kala duwan oo ka kala socday dowladda federaalka Soomaaliya, dowlad goboleedyada (xubno ka tirsan dowladda federaalka), deeq bixiyayaasha, Qaramada Midoobay, ururada bulshada rayidka ah, iyo qeybaha kale ee bulshada.