Puntland oo rag u dhashay Marooco dil ku xukuntay

Garoowe (QJ) -Maxkamadda darajada 1-aad ee ciidamada qalabka sida ee Puntland ayaa maanta xukun dil ah ku riday 6 nin oo dhalasho ahaan ka soo jeeda dalka Marooko, kuwaasi oo lagu helay dambiyo kala duwan.

Waxaa la ogaaday inay ka mid ahaayeen xubno ka tirsan ururka Daacish ee fadhigoodu yahay buuraleyda Cal Miskaad, halkaasoo weeraro badan lagu laayay dad rayid ah oo ku sugnaa deegaano ka tirsan Puntland iyo deegaano kale oo ka tirsan Soomaaliya.

Maxkamadda ayaa sheegtay in dadka la xukumay ay dhamaantood ka tirsan yihiin Daacish, islamarkaana dalka u soo galay in ay dhibaateeyaan muwaadiniinta Soomaaliyeed.

Maxkamaddu waxay sidoo kale Xabsi dheer ku ridday Muwaadin Soomaali ah iyo Shaqsi Itoobiyaan ah oo la shaqeynayay Ajaanibta la xukumay, iyadoo shaqsi kale oo Soomaali ah lagu waayay dambigii lagu soo eedeeyay.