Soomaaliya iyo Ugaandha oo iska kaashanaya dagaalka ka dhanka ah Al Shabaab

Kampala February 06, 2024 (QJ) -Taliyaha Ciidanka Xoogga Dalka Soomaaliyeed S/guuto Ibraahim Sheekh Muxudiin oo maalmahan ku sugnaa dalka Uganda ayaa la kulmay Taliyaha Ciidanka Milatariga Uganda Gen. Wilson Mbadi.

Labada Taliye ayaa ka wada hadlay iskaashiga iyo xoojinta xiriirka iskaashi ee labada dal, iyadoo dowladda Uganda ay ballan qaaday inay Soomaaliya ka taageeri doonto dagaalka ka dhanka ah Al-Shabaab.

Sarreeye Guuto Ibraahim Sheekh Muxudiin iyo Gen. Wilson Mbadi ayaa si wadajir ah isku afgartay in sare loo qaado howlgallada wadajirka ah ee lagu beegsanayo Al-Shabaab, iyadoo dowladda Uganda ay diyaar u tahay inay gacan siiso oo taageerto ciidamada qalabka sida ee Soomaaliya.

Sidoo kale, Taliyaha Ciidanka Xoogga Dalka Soomaaliyeed ayaa booqday Kuliyadda Difaaca Qaranka Uganda, halkaasi oo si heer sare ah loogu soo dhaweeyay, isla markaana uu kulamo la qaatay Saraakiisha Ciidanka Xoogga Dalka.