ATMIS oo soo gunaaday dhimida ciidamada ka jooga Soomaaliya

Moqdisho January 31, 2024 (QJ) -Taliska ciidamada Midowga Afrika ee ATMIS ayaa shaaca ka qaaday in dhowr xarumood oo ciidamada ay ku wareejiyeen dowladda Soomaaliya, taasi oo ka dhigan in la soo gaba gabeeyay wajigii labaad ee ka bixitaanka ciidamada ATMIS.

Alhaji Sarjoh Bah oo ah Agaasimaha Siyaasadda, Nabadda iyo Amniga ee Guddiga Midowga Afrika oo ka hadlay Munaasabad lagu xusayay Munaasabadda oo ka dhacday Magaalada Muqdisho ayaa hoosta ka xariiqay in ka bixitaankan ay calaamad u tahay horumarka wanaagsan ee ay Soomaaliya ku tallaabsatay.

Waxa uu sheegay in ciidamada ammaanka Soomaaliya ay muujiyeen dadaal iyo karti ay kaga hortagayaan Al-Shabaab, iyagoo ka qeyb qaadanaya xasilinta iyo amniga gobolka.

Wuxuu kaloo hoosta ka xariiqay dadaallada la taaban karo ee ay sameeyeen ATMIS-ka wadajirka ah, dowladda Soomaaliya, iyo Xafiiska Taageerada Qaramada Midoobay ee Soomaaliya si loo gaaro guushan muhiimka ah.

Waxa uu xusay in Midowga Afrika uu si weyn u taageersan yahay dhaqangelinta Hab-dhismeedka Amniga Soomaaliya, ee dhawaan lagu ansixiyay New York, kaasoo laf dhabar u ah horumarka iyo horumarka Soomaaliya.