Waddani oo ka digay colaado dheeri ah hadaan doorashooyinkii la qaban

Hargeysa March 12, 2023 (QJ) – Guddoomiye ku xigeenka xisbiga Waddani Axmed Cumar Xaaji (Xamarje) ayaa sheegay in haddii dib loo dhigo doorashada madaxtinimo ee Somaliland ay xaaladda Somaliland sii xumaan doonto, isla markaana ay soo wajihi karto amni darro hor leh.

Xamarje waxa uu tilmaamay in colaadda Laascaanood ay ku fidi karto Somaliland oo dhan haddii doorashadu dib u dhacdo.

“Komishanka doorashooyinka waxaan ka sugeynaa in doorashada madaxweynaha ay ku qabtaan mudada sagaalka bilood ah, hadii dib u dhac kale uu yimaado waxay u badan tahay in ay dhalin karto colaado la mid ah mida ka taagan magaalada Laascaanood ee gobolada kale” ayuu yiri Xamarje.

Guddoomiye ku xigeenku waxa kale oo uu ku eedeeyay Madaxweynaha xilka ka sii degaya ee Muuse Biixi Cabdi iyo Guddoomiyaha Golaha Guurtida ee aan la dooran Saleebaan Maxamuud Aadan inay ka dambeeyaan colaadda Laascaanood, isla markaana ay doorashadu ku qabsoomi weydo wakhtigeeda.

Waxa kale oo uu sheegay in xisbiga Waddani uu diyaar u yahay ka qayb galka doorashada madaxtooyada iyo ururada siyaasadda, balse lama hubo in madaxweyne Muuse Biixi Cabdi uu diyaar u yahay doorasho.

Xamarje ayaa hore loogu bartilmaameedsaday xukuumadda Somaliland, waxaanu ka mid ahaa in ka badan 10 siyaasiyiin ah oo xabsiga loo taxaabay ka dib mudaharaad dimuqraadi ah oo ka dhacay Somaliland.